ހދ. ހަނިމާދޫ އިންޓަނޭޝަނަލް އެއާޕޯޓު ތަރައްގީ ކުރުމަށްޓަކައި ސާވޭ ކުރުމުގެ މަސައްކަތް ފަށައިފިއެވެ.
އެ މަސައްކަތް ކުރިޔަށް ގެންދަނީ އިންޑިއާގެ އެހީތެރިކަމާއި އެކުގައެވެ. އިންޑިއާ ހައި ކޮމިޝަނުން ބުނީ އިންޑިއާ އެއާޕޯޓް އޮތޯރިޓީގެ ޓީމެއް ހަނިމާދޫގައި މިހާރު ހަރަކާތްތެރިވަމުން ދާކަމަށެވެ. އަދި އެއާޕޯޓް ބޮޑުކުރުމުގެ މަޝްރޫއަށް ބޭނުންވާ ކަންކަން ކުރިއަށްގެންދިއުމަށް ބޭނުންވާ ސާވޭގެ މަސައްކަތްތައް އެއަރޕޯޓް ސައިޓުގައި މިހާރު ފަށާފައި ވާކަމަށެވެ.
މި ޕްރޮޖެކްޓްގެދަށުން ހަނިމާދޫ އެއަރޕޯޓް ބޮޑުކޮށް ޒަމާނީ ފެންވަރަށް ތަރައްގީކުރުމަށް، ހަނިމާދޫ އެއާޕޯޓްގެ ރަންވޭ 2200 މީޓަރަށް ބޮޑުކުރުމަށް ވަނީ ހަމަޖައްސާފައެވެ. އަދި އެއާޕޯޓްގެ ޕެސެންޖާ ޓާމިނަލް ބޮޑުކުރުމާއި، ކާގޯ ޓާމިނަލް އާއި، ފިއުލް ފާމް އަދި ފަޔާ ސްޓޭޝަން އަޕްގްރޭޑްކޮށް ޒަމާނީ ފެންވަރަށް ތަރައްޤީކުރުން ހިމެނެއެވެ.
މި ޕްރޮޖެކްޓާއިއެކު މުޅި އުތުރުތަށް ބޮޑެތި ކުރިއެރުންތައް ލިބޭނެ ކަމަށް ހައި ކޮމިޝަނުން ވަނީ ބުނެފައެވެ. އަދި ވިޔަފާރިތައް އުފެދުމަށް ދޮރުހުޅުވުމާއި، މަސްވެރިކަމާއި، ފަތުރުވެރިކަމުގެ ވިޔަފާރި އާއި، އަދި އުމްރާނީ ތަރައްގީގެ ދާއިރާއިންވެސް ބޮޑު ކުރިއެރުމެއް ލިބޭނެ ކަމަށް ހައި ކޮމިޝަނުން ވަނީ ބުނެފައެވެ.