ކޮވިޑް19 ގެ ސަބަބުން ކެފޭ ރެސްޓޯރަންޓުތަކުގެ ވިޔަފާރި ދަށްވެ ބައެއް ތަންތަން ބަންދު ކުރަންޖެހޭ ހާލަތަށް މިހާރު ގޮސްފައިވާތީ އެތަންތަން ބަންދު ކުރުމަށްފަހު ރައީސް އޮފީހާ އެތަންތަނުގެ ތަޅުދަނޑި ފަތި ހަވާލު ކުރުމަށް ކެފޭ ރެސްޓޯރަންޓުތަކުގެ ވެރިން ތައްޔާރުވާން ފަށައިފިއެވެ.
ކެފޭ، ހޮޓާ، ރެސްޓޯރަންޓްތަކުގެ ޔޫނިއަން، މޯލްޑިވްސް އީޓަރީ ޔޫނިއަން (އެމްއީޔޫ) އިން މިއަދު ބޭއްވި ނޫސްވެރިންގެ ބައްދަލުވުމެއްގައި އެ ޔޫނިއަން އިން ވަނީ ކެފޭތަކާ މެދު އިހުމާލުވަމުން ގެންދާތީ ނުރުހުން ފާޅުކޮށްފައެވެ. ކެފޭ ރެސްޓޯރަންޓުގެ ވެރިން ދެކޭ ގޮތުގައި އެތަންތަނަކީ "ގުރުބާން ކުރަން ގެންގުޅޭ ކަންބަޅި" އެއް ކަމަށެވެ.
ކޮވިޑް19 ފެތުރުން ހުއްޓުވުމަށްޓަކައި ރޭގަނޑު 20:00 އިން ފެށިގެން ފަތިހު 5:00 އާއި ހަމައަށް އުޅަނދުތަކުގައި އެއްގަމު ދަތުރު ކުރުން މަނާ ކޮށްފައިވާއިރު ކެފޭތަކަށް އެންމެ ބޮޑަށް އާމްދަނީ ލިބެމުން އަންނަނީ ރޭގަނޑުގެ ވަގުތުގައި ކަމަށް ކެފޭ ރެސްޓޯރަންޓުތަކުން ހާމަކުރެއެވެ. އެހެންކަމުން އެ ފިޔަވަޅުތަކުގެ ސަބަބުން ކެފޭ ރެސްޓޯރަންޓުތަކުގެ ވެރިންނަށް ބޮޑެތި ގެއްލުންތަކެއް ވަނީ ލިބިފައެވެ.
މިފަދަ ތަންތަނަށް އެންމެ ބޮޑަށް ވިޔަފާރި ވަމުން އަންނަނީ ރޭގަނޑުކަން ފާހަގަކޮށް އެމްއީޔޫ އިން ބުނީ އެކަމުގައި ކެފޭ ރެސްޓޯރަންޓުތަކުގެ ވެރިންގެ ހުރި ކަންބޮޑުވުންތައް ސަރުކާރުގެ ކަމާ ގުޅުންހުރި އިދާރާތަކާއި ބައްދަލުކޮށް މަޝްވަރާ ކުރަމުން އަންނަތާ މަހަކަށްވުރެ ގިނަ ދުވަސްވެފައިވާ ކަމަށެވެ.
އެ ވިޔަފާރި މިހާރު އޮތީ ތަންތަން ބަންދުކޮށް އެ ތަންތަނުގެ ތަޅުދަނޑި އާއި މުވައްޒަފުން ރައީސް އޮފީހާއި ހަވާލު ކުރަންޖެހޭ ފަދަ ހާލަތެއްގައި ކަމަށާ އެކަން ކުރުމަށް ތަައްޔާރުވަމުންދާ ކަމަށެވެ.