ރާއްޖޭގައި ބާއްވާ އިންތިހާބެއް ވެއްޖިއްޔާ އެ އަތޮޅުގެ ރައްޔިތުންގެ ތާއީދާ ނުލާ އެއްވެސް އިންތިހާބެއް އެއްވެސް ބަޔަކަށް ތާއީދެއް ނުކުރެވެއެވެ. އެ އަތޮޅުގެ ރައްޔިތުން ވެފައި ވަނީ ވޯޓުގެ ނަތީޖާ ބަދަލު ކޮށްލާނެ ބަޔަކަށެވެ. އިންތިހާބުތަކުގައި ކޮންމެ ބޭފުޅަކުވެސް ސްޓޭޖުތަކަށް އަރާ މައިކު ހިތްޕަވައިގެން އެ އަތޮޅުގެ ރައްޔިތުން ގާތު ނިކަން ފޮނި ބައިސާތައް ކަނޑައެވެ. ސަބަބަކީ އެ އަތޮޅުގެ ރައްޔިތުންގެ "ބްލެސިން" ލިބިގެން ނޫނީ ރިޔާސީ އިންތިހާބެއްވެސް ރައްޔިތުން މަޖިލީހުގެ އިންތިހާބެއް ވެސް އަދި ލޯކަލް ކައުންސިލް އިންތިހާބެއް ވެސް ކާމިޔާބު ކުރުމަކީ ނާދިރު ކަމަކަށްވުމެވެ. މިއީ މާލެ ސިޓީ ނެގުމަށްފަހު ރާއްޖޭގެ އެންމެ ބޮޑު އާބާދީއެއް ދިރިއުޅޭ އައްޑޫ ސިޓީ ނުވަތަ އައްޑު އަތޮޅުގެ ވާހަކައެވެ.
މާޒީގައި ހިނގާދިޔަ ކަންކަމަށް ނަޒަރު ހިންގާލަމާ ހެއްޔެވެ. ވޭތުވެދިޔަ އެއްވެސް ރިޔާސީ އިންތިހާބެއް އައްޑޫ ރައްޔިތުންގެ ތާއީދު ނުލިބި އެއްވެސް ބޭފުޅަކަށް ތާއީދު ކުރެވިފައެއް ނުވެއެވެ. ރައްޔިތުން މަޖިލީހުގެ އިންތިހާބުގައިތަކުގައި ވެސް އައްޑޫ ސިޓީ ރައްޔިތުން ވަނީ އެ ރައްޔިތުންގެ އަމާނާތްތެރި ވޯޓުތައް އެ ރައްޔިތުންގެ ހައްގުވެރިންނަށް ދީފައެވެ. އާހިރުގައި އައްޑޫ ރައްޔިތުންނަށް ލިބެނީ "ހެޔޮ ކަމެއް ކޮށްދިން މީހަކަށް ތެޔޮ ހަމެކޭ" ބުނާ އުސޫލުން "ތެޔޮ ހަމެ"ކެވެ. މިއީ އައްޑޫ ރައްޔިތުންނަށް ހައްގު މިންވަރު ކަމަށް ދެކެނީތޯއެވެ.
އިއްޔެ އަކީ 2018ވަނަ އަހަރު ބޭއްވި ރިޔާސީ އިންތިހާބު ރައީސް އިބްރާހީމް މުހައްމަދު ސޯލިހު ބޮޑުތަނުން ކާމިޔާބު ކުރައްވާ ރާއްޖޭގެ ރައީސުލްޖުމްހޫރިއްޔާގެ ގޮނޑިކޮޅު ކަށަވަރުކުރެއްވި ދުވަހެވެ. އައްޑޫ ސިޓީގެ އެތައް ރަށްތަކަށް އެތަކެއް ފަހަރަކު ވަޑައިގަތެވެ. ކޮންމެ ދަތުރެއްގައި ވެސް އެތައް ކަންތައްތަކެއް ކޮށްދެއްވާނެ ކަމަށް ވިދާޅުވިއެވެ. ތެދަށް ދަންނަވާނަމަ ކުރީގެ ރައީސް އަބްދުﷲ ޔާމީނު ރިޔާސީ އިންތިހާބުން ބަލިވި އެއް ސަބަކަކަށް އައްޑޫ ރައްޔިތުންނަށް އަޅާ ނުލުން ވެދާނެއެވެ. އެ އަތޮޅުގެ ރައްޔިތުންގެ މުހުތާދުތައް ނުފުއްދައިދިން ވެރިޔަކަށް އެ ރައްޔިތުންގެ ވޯޓެއް ނުލިބޭނެއެވެ. އެކަން ރިޔާސީ އިންތިހާބުން ރައީސް ޔާމީނަށް އައްޑޫ ރައްޔިތުން ވަނީ ދައްކުވައި ދީފައެވެ.
ނަމަވެސް އެ ސަރުކާރެކޭ އުއްމީދުން ފުރިގެން ތިބެ ވޯޓުދިން ރައީސް އިބްރާހީމް މުހައްމަދު ސޯލިހުގެ ސަރުކާރެކޭ އޮތީ ކޮން ތަފާތެއް ހެއްޔެވެ. ވެރިކަމުގެ ހުވާ ކުރެއްވިތާ ދެ އަހަރު ނުވި ނަމަވެސް ވެރިކަމަށް އިންތިހާބުވިތާ ދެ އަހަރު ފުރިއްޖެއެވެ. މިހާތަނަށް އައްޑޫ ރައްޔިތުންނަށް ބިޔަ ބޮޑު މަޝްރޫއުއެއް ހިނގަމުންދާކަން ފެނިފައެއް ނެތެވެ. އެހެންނަމަވެސް ސަރުކާރުގެ ކުންފުނި އެމްޓީސީސީ އިން ބައެއް ރަށްރަށުގެ ބަނދަރު ހެދުމުގެ މަސައްކަތްތައް ނުކުރެއެކޭ ނުދެންނެވޭނެއެވެ. އެކަމަކު އައްޑޫ ރައްޔިތުން އެންމެ ބޭނުން ވަނީ ރާއްޖޭގެ އެންމެ އާބާދީ ބޮޑު އަތޮޅުގައި ތަރައްގީގެ "މާސިންގާ" މަޝްރޫއެއް ހިންގާތަން ބަލާލުމަށެވެ. އެ މަޝްރޫއު އިން އައްޑޫ ރައްޔިތުންނަށް ސީދާ ފައިދާ ކުރުމެވެ.
މިހާތަނަށް އެ މަޝްރޫއުތައް ފެށިފައެއް ނުވެއެވެ. އެކަމަކު އެ މަޝްރޫއުތަކުގެ އަޑުތައް ރިޔާސީ އިންތިހާބުން ފެށިގެން ރައްޔިތުން މަޖިލީހުގެ އިންތިހާބުގެ ކެމްޕެއިން ޖަލްސާތަކުން އައްޑޫ ރައްޔިތުންގެ ހިތްތަކަށް ފިނިކަން ގެނެސްދިނެވެ. ނޫސްތަކުގެ ސުރުހީތަކުން މަޝްރޫއުތަކެއް ފަށަން އުޅޭ ކަމުގެ ވާހަކަތައް ފެނި މޫނު މައްޗަށް ހިނިތުންވުން ގެނެސްދީފައި އެބަހުއްޓެވެ. އެކަމަކު ސަރުކާރު އިންތިހާބުވެ ދެ އަހަރު ވެގެން ދިޔައިރުވެސް އައްޑޫ ރައްޔިތުންގެ ލޯ މައްޗަށް އެއިން އެއްވެސް މަޝްރޫއުއެއް ފެންނާކަށް ނެތެވެ.
މި ފަސް އަހަރުތެރޭ އައްޑޫ އަކީ މީހުން އުޅެން ބޭނުންވާ އަދި މީހުންނަށް އަރާމު ދިރިއުޅުމެއް އުޅެވޭނެ ތަނަކަށް ހެދުމަށް ބޭނުންވާ ކަމަށް ސަރުކާރުން އަންދާޒާ ކުރަނީ 300 މިލިއަން ޑޮލަރު ކަމަށް ސަރުކާރުގެ އިގްތިސޯދީ ވަޒީރު ފައްޔާޒު އިސްމާއީލް ވަނީ މީގެކުރިން ވިދާޅުވެފައެވެ. ފައިސާވެސް ހަމަޖެހިފައި ހުރި ކަމަށް ވިދާޅުވިއެވެ. އެ މަޝްރޫއުގެ ދަށުން އައްޑޫގައި 8000 އެނދު ތައްޔާރުކުރުމުގެ އިތުރުން ބައެއް ރިސޯޓާއި ސިޓީ ހޮޓެލްތައް ހެދުމުގެ ޕްރޮގްރާމްތައް ވެސް ކުރިއަށްގެންދާނެ ކަމަށް ވިދާޅުވިއެވެ.
އެ މަޝްރޫއު ކޮބާ ހެއްޔެވެ؟ ކޮވިޑް-19 އަކީ ހުއްޖަތެއް ކަމަށް ސަރުކާރުން ދައްކަވާނެއެވެ. ނަމަވެސް މިނިސްޓަރު ފައްޔާޒު ވިދާޅުވި ގޮތުގައި ފައިސާ ހުރީ ހަމަޖެހިފައެވެ. ފައިސާ ހަމަޖެހިފައި ހުރި މި ބޮޑު މަޝްރޫއު ނުފެށިގެން އުޅެނީ ކޮން ސަބަބަކާއި ހެދި ހެއްޔެވެ. އައްޑޫ ރައްޔިތުންނަށް އެކަން ސާފުވާންޖެހެއެވެ. ކޮންމެ ފަހަރަކު ޓީވީ ޕްރޮގްރާމުތަކާއި ނޫސްތަކަށް ދެއްވާ އިންޓަވިއުތަކުގައި އައްޑޫ އަކީ ރާއްޖޭގެ އިގްތިސޯދުގެ މުހިއްމު ހަބެއް ކަމަށް ވިދާޅުވުމަކުން ނުފެދެއެވެ. އެ މުހިއްމުކަން ރައްޔިތުންނަށް އަމަލު ދައްކުވައިދެއްވަން ޖެހެއެވެ.
އަދި ވިދާޅުވެފައިވެއެވެ. އެ މަސައްކަތްތައް ކުރުމަކީ ފަސޭހަ ކަމެއް ކަމަށާއި އެކަމަކު އެ މަސައްކަތް ކުރުމަށް ސަރުކާރުގެ މެޖޯރިޓީ އޮންނަ މަޖިލީހެއް ބޭނުންވާ ކަމަށެވެ. އެފަދަ މަޖިލީހެއް [ސަރުކާރުގެ މެޖޯރިޓީ] ނެތް މަޖިލީހެއް ނުލިބިއްޖެ ނަމަ އެކަން ކުރުމަށް ދަތިވާނެ ކަމަށެވެ. މަޖިލިސް ދެވިއްޖެއެވެ. އެވެވެސް ތާރީހުގައި ވެސް ރައްޔިތުން ނުދޭ ވަރުގެ އަގުލަބިއްޔަތަކާއި އެކުގައެވެ. އަންނަ އަހަރަށް ރައްޔިތުންގެ މަޖިލީހަށް ވެސް ދެ އަހަރު ވާނެއެވެ. އައްޑޫ ތަރައްގީގައި "ގާ ގަނޑެއްވެސް" އަދި ބައިންދާލާފައެއް ނެތެވެ.
އެއީ ހަމައެކަނި މިނިސްޓަރު ފައްޔާޒު ވިދާޅުވި ވާހަކަފުޅެވެ. ރައީސް އިބްރާހީމް މުހައްމަދު ސޯލިހު ދައްކަވާފައިވާ ބައެއް ވާހަކަތަކަށް ބަލާލަމާތޯއެވެ. އައްޑޫ ސިޓީ ތަރައްގީ ކުރުމަށް 5.3 ބިލިއަން ރުފިޔާގެ މަޝްރޫއެއް ސަރުކާރުން އެކުލަވާލާފައިވާކަން މިދިޔަ އަހަރުގެ މާޗު މަހުގެ 8ވަނަ ދުވަހު ރައީސް އިއުލާން ކުރެއްވިއެވެ.
ރައީސް ސޯލިހު ވިދާޅުވީ ގައުމު ތަރައްގީ ވާނީ މާލެ ނޫން ތަންތަން ވެސް ތަރައްގީ ވެގެން ކަމަށާއި ސަރުކާރުން އައްޑޫއާ މެދު ގެންގުޅޭ ތަސައްވުރު ވަރަށް ބޮޑު ކަމަށެވެ. އެ ތަސައްވުރަކީ ސީދާ އައްޑޫ އިން އުފެންވެގެން އައި ތަސައްވުރެއް ކަމަށާއި އެމަނިކުފާނުގެ ދައުރަކީ އެ ތަސައްވުރު ހަގީގަތަކަށް ހަދައިދިނުން ކަމަށްވެސް ރައީސް ވިދާޅުވިއެވެ.
އެ މަޝްރޫގެ ދަށުން ފަތުރުވެރިކަމަށް 8000 އެނދު އިތުރުކުރުމާއި، އައްޑޫގެ ބިން އިތުރުކުރުމާއި، ބައިނަލްއަގުވާމީ ފެންވަރަށް އައްޑޫގެ ޕޯޓު ތަރައްގީ ކުރުމާއި، އައްޑޫގައި 17 ކިލޯ މީޓަރުގެ މަގު ހެދުމާއި، މަސް ބަނދަރާއި، މަސް ޕްރޮސެސްކުރާނެ ފެކްޓަރީއެއް ހެދުމާއި، އައްޑޫގެ ކަރަންޓުގެ ހިދުމަތަށް ކުރިމަތިވެފައިވާ ގޮންޖެހުންތަކަށް ދާއިމީ ހައްލު ހޯދައިދިނުން ހިމެނެއެވެ. މީގެއިތުރުން އިޖްތިމާއީ ގޮތުން އައްޑޫ ސިޓީ އަށް ބޭނުންވާ ސްޕޯޓްސް ކޮމްޕްލެކްސް އެޅުމާއި، ސްވިމިންޕޫލާއި ފުޓްބޯޅަ ދަނޑެއް އެ ބިޔަ މަޝްރޫގައި ހިމެނިފައިވެއެވެ. މީގެއިތުރުންވެސް އެތައް ކަންތައްތަކެއް މި މަޝްރޫއުގައި ހުރީ ކުރަން ނިންމާފައެވެ.
ވެރިކަމަށް ދެ އަހަރު ފުރިގެން ތިންވަނަ އަހަރަކަށް އެޅިގެން ދާއިރު މި ބިޔަ ބޮޑު މަޝްރޫއު ފެށި ނިމޭނެ ކަމަށް ސަރުކާރަށް ހީވަނީތޯއެވެ. މި ދައްކަނީ އެންމެ ބްރިޖެއް އަޅާ ވާހަކައެއް ނޫނެވެ. ކުރީގެ ރައީސް ޔާމީންގެ ސަރުކާރުން ސިނަމާލެ ބްރިޖުގެ މަސައްކަތް އެޅުމުގެ މަސައްކަތް ކުރިޔަށް ދިޔައިރު އެއީ ފަސް އަހަރުގެ ތެރޭގައި ނިންމާލެވޭނެ ތަނެއްތޯ މިއަދު ސަރުކާރުގައި ތިބި ފަރާތްތަކުން ސުވާލު ކުރެއްވިއެވެ.
މިއަދު އައްޑޫ ރައްޔިތުންވެސް ހަމަ އެ ސުވާލު އަދުގެ ސަރުކާރަށް ކުރައްވައެވެ. އެފަދަ ބިޔަ ބޮޑު މަޝްރޫއެއް މިހާތަނަށް ފެށިފައި ނުވާއިރު ތިން އަހަރުގެ ތެރޭގައި އެ މަޝްރޫއު އެއްކޮށް ނިންމާލާ މި ބޮޑު މަޝްރޫއާއެކު މުޅި އައްޑޫ އާރާސްތުވެ، އައްޑޫގެ އިނދަޖެހިފައިވާ އިގްތިސާދު ކޮޅަށް ޖަހާ، މުޅި ގައުމުގެ އިގްތިސާދުގެ އިންޖީނަކަށް އައްޑޫ ބަދަލުވެގެންދާނީ ކިހިނެއްތޯއެވެ. އައްޑޫއަކީ ވޯޓު ހޯދަން އަންނަ އަތޮޅެއްގެ ގޮތުގައި ސިޔާސީ ވެރިން ދެކުން ހުއްޓާލަން ވެއްޖެއެވެ. އައްޑޫ އަކީ ވެސް ދިރިހުރި އެތަކެއް ރައްޔިތުންތަކެއް އުޅޭ އަތޮޅެއް ކަމާއި ނަމުން ސިޓީގެ ދަރަޖަ ދިން ނަމަވެސް އެ ސިޓީއިން، ސިޓީއެއްގެ ހިދުމަތްތައް ލިބޭނެ މަގު ތަނަވަސް ކޮށްދީ ރައްޔިތުންގެ ޖީބުތައް ތަނަވަސް ކޮށްދިނުމަށް ސަރުކާރުތަކުން ވިސްނަންވެއްޖެއެވެ.