ހުޅުމާލެ ދެވަނަ ފިޔަވަހީގައި އިމާރާތް ކޮށްފައިވާ ހިޔާ ފްލެޓުތަކަށް ނަރުދަމާ އެޅުމުގެ މަސައްކަތް ފަށައިފިއެވެ.
އެ މަސައްކަތް ކުރިޔަށް ގެންދަނީ ސަރުކާރުގެ ފެންކުންފުނި އެމްޑަބްލިއުއެސްސީ އިންނެވެ. އެ މަޝްރޫއު ފައްޓަވައި ދެއްވީ އެމްޑަބްލިއުއެސްސީގެ ޗެއާޕާސަން އަހުމަދު މައުސޫމް އަދި މެނޭޖިން ޑިރެކްޓަރ ހަސަން ޝާހުއެވެ.
ހިޔާ މަޝްރޫއުގެ ދަށުން 16 ޓަވަރެއް ތަރައްގީކޮށްފައިވާއިރު އެތަންތަނަަށް 580 ކަނެކްޝަން ގުޅައިދިނުމަށް ހަމަޖެހިފައިވެއެވެ. އެ ޓަވަރުތަަކަށް 11،003 މީޓަރުގެ ނަރުދަމާގެ މައި ނެޓްވޯކަކާއި، 283 މޭން ހޯލް އާއި ދެ ޕަންޕިންގް ސްޓޭޝަން ގާއިމް ކުރާނެއެވެ.
އެމްޑަބްލިއުއެސްސީ އިން މީގެކުރިން ބުނެފައި ވަނީ އެ މަސައްކަތް އަންނަ އަހަރުގެ ފެބްރުއަރީ މަހުގެ ނިޔަލަށް ނިންމުމަށް ތާވަލު ކޮށްފައިވާ ކަމަށެވެ.
ޖުމްލަ 13 ކެޓަގަރީއަކުން ފްލެޓް ދޭ ގޮތަށް އިއުލާން ކުރި "ހިޔާ" މަޝްރޫއިން ފްލެޓް ހޯދަން ހުށަހަޅާފައިވާ 25،000 ވަރަކަށް ފޯމެވެ. ކުރީގެ ރައީސް އަބްދުﷲ ޔާމީން އަބްދުލް ގައްޔޫމްގެ ސަރުކާރުން ހުޅުމާލޭގައި ހިޔާ މަޝްރޫއުގެ ދަށުން އަޅާފައިވާ ފްލެޓުތަކަށް މަހަކު ދައްކަންޖެހޭ ފައިސާގެ އަދަދު 7000 އަށް ވުރެ ކުޑަވާނެ ކަމަށް ސަރުކާރުން ބުނެއެވެ.