ސަރުކާރު ހިންގާ މައި ޕާޓީ އެމްޑީޕީ މެންބަރުންގެ އަދަދު ދަށްވެފައިވާތަން އިލެކްޝަންސް ކޮމިޝަނުން އާއްމު ކޮށްފައިވާ ޕާޓީތަކުގެ މެންބަރުންގެ ދަފްތަރުން ހާމަވެއްޖެއެވެ.
އެގޮތުން ވޭތުވެދިޔަ އެއް އަހަރުގެ ތެރޭގައި 638 މީހުން ވަނީ އެޕާޓީ އިން ވަކިވެފައެވެ. މެންބަރުންގެ އަދަދު މަދުވެ އެޕާޓީގެ މެންބަރުން ތިބި އަދަދު ވަނީ 52،952 އަށް ވެއްޓިފައެވެ. ފާއިތުވި އެއް އަހަރުގެ ތެރޭގައި އިދިކޮޅު ޕީޕީއެމް އަށް 343 މެންބަރުން އިތުރުވެ އެޕާޓީގެ މެންބަރުންގެ އަދަދު ވަނީ 37،144 އަށް އިތުރުވެފައެވެ.
އެންމެ ގިނައިން މެންބަރުން އިތުރުވެފައި ވަނީ ސަރުކާރު ކޯލިޝަން ޖުމްހޫރީ ޕާޓީ (ޖޭޕީ)ގައެވެ. ފާއިތުވި އެއް އަހަރުގެ މުއްދަތުގެ ތެރޭގައި 3،667 މީހަކު އެޕާޓީ އާއި ވަނީ އަލަށް ގުޅިފައެވެ. އެހެންކަމުން މިހާރު އެޕާޓީގައި ތިބީ 13،852 މެންބަރުންނެވެ.
އަދާލަތު ޕާޓީވެސް ވަނީ ވޭތުވެދިޔަ އެއް އަހަރު ތެރޭގައި މެންބަރުންގެ އަދަދު އިތުރުކޮށްފައެވެ. މިދިޔަ އަހަރު އެޕާޓީގައި ތިބީ 6،436 މެންބަރުންނެވެ. ނަމަވެސް މިހާރު އެޕާޓީގައި ތިބި ކަމަށް ދައްކަނީ 6،640 މެންބަރުންނެވެ.
މިދިޔަ އަހަރުގެ ސެޕްޓެމްބަރު މަހުގެ 30ވަނަ ދުވަހުގެ ނިޔަލަށް އިދިކޮޅު ޕީއެންސީގައި 4،455 މެންބަރުން ތިބި ނަމަވެސް މިހާރު އެޕާޓީގައި ތިބީ 4،004 މެންބަރުންނެވެ.
ލޭބާ ޕާޓީގައި 2،915 މެންބަރުން މިދިޔަ އަހަރު ތިބި ކަމަށް ދެއްކި ނަމަވެސް މިހާރުގެ އިލެކްޝަނުގެ ދަފްތަރުން ދައްކާ ގޮތުގައި އެޕާޓީގައި ތިބީ 2،881 މެންބަރުންނެވެ. އެމްޓީޑީގައި 3،454 މެންބަރުން މިދިޔަ އަހަރު ތިބި ނަމަވެސް ތަފާސް ހިސާބުން ދައްކަނީ އެޕާޓީގައި މިހާރު ތިބީ 3،171 މެންބަރުން ކަމަށެވެ.