އައްޑޫގެ އެކި ހިސާބުތަކުގައި ކާޅު އާލާވެ، އައްޑޫގެ އެއް ފަހުރު ކަމުގައިވާ ދޮންދީނި ނެތި ހިނގައިދާނެކަމުގެ ބިރުހީވެއްޖެއެވެ.
ކާޅު އައްޑޫގައި އިތުރުވަމުން އަންނަ ކަމަށް ބުނެ އާއްމު ބައެއް ފަރާތްތަކުން އަންނަނީ އެކަން ބަލައި އަވަސް ހައްލެއްް ހޯދުމަށް ކަމާއި ބެހޭ ފަރާތްތަކަށް ގޮވާލަމުންނެވެ. އެގޮތުން ބައެއް މީހުން ވަނީ ކާޅުތައް ކުދި ދޮންދީނި ތަކަށް ހަމަލާދޭ ފޮޓޯވެސް އާއްމުކޮށްފައެވެ.
ދާދި ފަހުން ސޯޝަލް މީޑިއާގައި ދައުރުވި އެއް ވީޑިއޯއަކީ ކާޅަކު، ދޮންދީނިއަކަށް ހަމަލާދީ މަރާލުމަށްފަހު، އޭގެ މަސް ނޮޅައިގެން ކަމުން ދިޔަ މަންޒަރު ފެންނަ ވީޑިއޯއެކެވެ. މިއަހަރުގެ އޮގަސްޓު މަހުގެ ތެރޭގައި ނަގާފައިވާ އެވީޑިއޯ ސޯޝަލް މީޑިއާގައި ހިއްސާކޮށް އެކަން ބަލައިދިނުމަށް ކަމާއި ބެހޭ ފަރާތްތަކުގައި އެދިފައިވެއެވެ. އަދި ކާޅު އައްޑޫއަށް ގެނައި ފަރާތެއް ހޯދައި ޖަވާބުދާރީ ކުރުމަށްވެސް އެފަރާތުން ވަނީ ކަމާއި ބެހޭ ފަރާތްތަކަށް ގޮވާލާފައެވެ.
"އައްޑޫލައިވް" އާއި ވާހަކަ ދެއްކި ހުޅުދޫގެ ޒުވާނަކު ބުނީ ހުޅުދޫ އަދި މީދޫގައި މިހާރު ގިނަ އަދަދަކަށް ކާޅު އުޅެމުން އަންނަ ކަމަށެވެ. އެގޮތުން ބައެއް ފަހަރު ގްރޫޕް ހަދައިގެން ކާޅުތައް އުޅޭތަންވެސް ފެންނަ ކަމަށެވެ.
"ހުޅުމީދޫގެ އެކި ހިސާބުތަކުން މިހާރު ކާޅު ފެނުން އާއްމުވެއްޖެ، ގާތްގަޑަކަށް ހުރިހާ ދިމާލަކުންވެސް މިހާރު ކާޅު އެބަފެނޭ، ހީވަނީ ގިނަ އަދަދަކަށް ކާޅު އުޅޭކަމަށް"
ކާޅުތައް އައްޑޫގައި އާލާވަމުން އަންނަ އިރު އޭގެ ނުރައްކާ އެންމެ ބޮޑު އެކައްޗަކީ އައްޑޫގެ ފަހުރު ކަމުގައިވާ ދޮންދީނިއެވެ. ކާޅުތައް އަންނަނީ ދޮންދީނިތަކަށް ހަމަލާދީ ދޮންދީނިތައް މަރަމުންނެވެ.
"އެބަފެނޭ ބައެއް ފަހަރު ކާޅުތައް ދޮންދީނަށް ހަމަލާދޭ ތަން، މީގެ ކުރިން ދޮންދީނިތައް ކާޅުތައް އައްޑޫގައި އާލާވިޔަ ނުދީ، ކާޅުތައް ފައްސާލާ، އެކަމަކު މިހާރު މިފެންނަނީ ކާޅުތައް އިތުރުވެ، ދޮންދީނިތަކަށް ހަމަލާދޭ ތަން"
ކާޅުތައް އިތުރުވަމުން އަންނަ ކަމުގެ ޝަކުވާ ރައްޔިތުން ކުރަމުންދާތީ އެކަމާއި ގުޅޭ ގޮތުން ކައުންސިލާއި ވާހަކަ ދެއްކުމުން އައްޑޫގެ މޭޔަރ އަބްދުﷲ ސޯދިގު (ސޯބެ) ވިދާޅުވީ ކާޅު އައްޑޫގައި އާލާވަމުން އަންނަ ކަމުގެ މައުލޫމާތެއް އަދި މިހާތަނަށް ލިބިފައި ނެތް ކަމަށެވެ. ނަމަވެސް އެކަމަކީ ސީރިއަސް މައްސަލައެއް ކަމަށް ސޯބެ ވިދާޅުވިއެވެ.
"އަދި ތިކަހަލަ މައުލޫމާތެއް ލިބިފައި ނެތް، އެކަމަކު ތިއީ ސީރިއަސްކޮށް ބަލަން ޖެހޭ ކަމެއް، ކަމާއި ބެހޭ ފަރާތްތަކާއި އެކަން އެބަ ބަލަން" ސޯބެ ވިދާޅުވިއެވެ.
ކާޅު އައްޑޫގައި އިތުރުވުމާއި ގުޅޭ ގޮތުން އާއްމުން ދަނީ ތަފާތުގޮތްތަކަށް ވާހަކަ ދައްކަމުންނެވެ. އެގޮތުން ބައެއް މީހުން ބުނީ މިއީ ބަޔަކު ގަސްތުގައި އައްޑޫން ދޮންދީނި ނައްތާލަން ހިންގާ ހީލަތްތެރި ޖަރީމާއެއް ކަމަށެވެ.
"ހީވަނީ ބަޔަކު ގަސްތުގައި އައްޑޫއަށް ކާޅު ގެނައީ ކަމަށް، އެހާ ގިނަ އިން މިފެންނަނީ ހީވަނީ ގިނަ އަދަދެއްގެ ކާޅު ގެނެސް އައްޑޫއަށް ދޫކޮށްލީ ކަމަށް" އައްޑޫލައިވް އާއި ވާހަކަ ދެއްކި ހުޅުދޫ ޒުވާނަކު ބުންޏެވެ.
ޒަމާނުއްސުރެ އައްޑޫގައި ކާޅު އާލާވެ އުޅެފައި ނުވެއެވެ. އޭގެ ބަދަލުގައި އައްޑޫގެ ޖައްވުތަކުގައި ހަމަ ހިމޭން ކަމާއި އެކު އުދުހެމުން ގޮސްފައިވަނީ ހުދު ދޮން ދީނިއެވެ.