ހދ. ކުޅުދުއްފުށިން ކޮވިޑު-19އަށް މީހަކު ޕޮޒިޓިވްވުމާއި ގުޅިގެން އެރަށައްް އަރައި ފޭބުން ހެލްތު ޕްރޮޓެކްޝަން އެޖެންސީ (އެޗްޕީއޭ) އިން މަނާކޮށްފިއެވެ.
އެނގިފައިވާ ގޮތުގައި ކުޅުދުއްފުށިން މިއަދު ކޮވިޑު-19 އަށް ޕޮޒިޓިވްވެފައިވަނީ އެރަށާއި މާލެ އާއި ދެމެދު ދުއްވާ ފާޅު ބޯޓުގެ ކެޕްޓަނެވެ. އެބޯޓު މާލެއިން ކުޅުދުއްފުއްޓަށް ގޮސްފައިވަނީ މިއަދު ހެނދުނުއެވެ.
ފާޅު ބޯޓުގެ ކެޕްޓަން ޕޮޒިޓިވްވުމާއި ގުޅިގެން އެރަށް ވަނީ މިރޭ 8:45 އިން ފެށިގެން މޮނިޓަރިންގެ ހާލަތުގައެވެ. އެޗްޕީއޭއިން އެރަށް މޮނިޓަރިންގެ ހާލަތަށް ގެނައިކަން އަންގައި ކައުންސިލަށް ފޮނުވި ސިޓީގައި ބުނެފައިވަނީ ކޮވިޑް-19 އާ ގުޅިގެން އިތުރަށް ބަލަން ޖެހޭ ކަންތައްތައް ބެލުމަށް ރަށުގައި މިވަގުތު ތިބި އެއްވެސް މީހަކު އެޗްޕީއޭއިން ވަކިގޮތެއް އަންގަން ދެން ރަށުން ފޭބުމާއި ރަށަށް އެރުން މަނާކޮށްފައިވާ ކަމަށެވެ.
ކުޅުދުއްފުށީގެ އިތުރުން އެއަތޮޅު ނޮޅިވަރަންވެސް ވަނީ މޮނިޓާރިންގެ ހާލަތަށް ގެނެސްފައެވެ.