ދިވެހި ރާއްޖެއިން ކޮވިޑަށް ޕޮޒިޓިވްވީ މީހުންގެ ޖުމްލަ 10،000 އަށް ވުރެ އިތުރުވެއްޖެއެވެ.
ހެލްތު ޕްރޮޓެކްޝަން އެޖެންސީ (އެޗްޕީއޭ) އިން މިރޭ ނެރެފައިވާ ކޮވިޑު-19ގެ ތަފާސް ހިސާބުތަކުން ދައްކާގޮތުގައި ފާއިތުވި 24 ގަޑި އިރު ތެރޭ ރާއްޖެއިން ވަނީ 75 މީހަކު ކޮވިޑަށް ޕޮޒިޓިވްވެފައެވެ. އެއީ މާލެ ސަރަހައްދުން ޕޮޒިޓިވްވި 66 މީހަކާއި އަތޮޅުތަކުން ޕޮޒިޓިވްވި 9 މީހެކެވެ. މިއާއި އެކު މިއަދު އިރުއޮއްސި 6 ޖެހުމާއި ހަމައަށް ރާއްޖެއިން މި ބަލި ޖެހުނު ޖުމްލަ މީހުންގެ އަދަދު މިވަނީ 10،014އަށް އަރާފައެވެ.
އެޗްޕީއޭގެ ހިސާބުތަކުން ދައްކާ ގޮތުގައި މިވަގުތު 1300 މީހަކަށް އަންނަނީ ބަލީގެ ފަރުވާދެމުންނެވެ. އޭގެ ތެރެއިން 82 މީހަކަށް ފަރުވާދެމުން އަންނަނީ ހޮސްޕިޓަލްގައި އެޑްމިޓުކޮށްގެންނެވެ. 796 މީހަކަށް ފެސިލިޓީތަކުގައި ފަރުވާދެމުންދާ އިރު މި ބަލީގައި 34 މީހަކު ވަނީ މަރުވެފައެވެ.