ކޮވިޑް19 އާއި ގުޅިގެން ހެލްތު ޕްރޮޓެކްޝަން އެޖެންސީ (އެޗްޕީއޭ) އިން އަންގާފައިވާ އެންގުންތަކާއި ހިލާފުވި 4،700 އަށްވުރެ ގިނަ މީހުން ޖޫރިމަނާކޮށްފިއެވެ.
ހެލްތު އިމަޖެންސީ އޮޕަރޭޝަން ސެންޓަރުން ރޭ ބޭއްވި ނޫސްވެރިންގެ ބައްދަލުވުމެއްގައި ޗީފް ސުޕްރިންޓެންޑެންޓް އޮފް ޕޮލިސް އަދި ހެޑް އޮފް މާލޭ ސިޓީ ޕޮލިސް ޢަބްދުﷲ ޝަރީފް ވިދާޅުވީ މާސްކު ނާޅާ މަގު މައްޗަށް ނިކުމެ އުޅުނު މީހުންގެ ތެރެއިން 3،877 މީހަކަށް ނަސޭހަތް ދީފައިވާނެ ކަމަށެވެ. އަދި 1،798 މީހަކު ޖޫރިމަނާ ކޮށްފައިވާ ކަމަށެވެ.
މަގުތަކަށް ނިކުމެ އުޅުން މަނާ ކޮށްފައިވާ ވަގުތުތަކުގައި މަގުތަކަށް ނިކުމެ އުޅުނު 4،833 މީހަކަށް ނަސޭހަތް ދިންއިރު 2،195 މީހަކު ޖޫރިމަނާ ކޮށްފައިވާ ކަމަށް ޝަރީފް ވިދާޅުވިއެވެ. ވެހިކަލް ދުއްވުން މަނާ ގަޑީގައި، ވެހިކަލުތަކުގައި ބޭރުގައި އުޅުނު 4،321 މީހަކަށް ނަސޭހަތް ދީފައިވާ ކަމަށާއި އޭގެތެރެއިން 781 މީހަކު ޖޫރިމަނާ ކޮށްފައިވާ ކަމަށް ވެސް ޝަރީފް ވިދާޅުވިއެވެ.
މީގެއިތުރުން ރޭގެ ބައްދަލުވުމުގައި ޝަރީފް ވިދާޅުވީ މި ފަހަކަށް އައިސް މިހާރު މަނާގަޑިތަކުގައި ވެހިކަލް ދުއްވުން އިތުރުވުމާ އާންމު ރައްޔިތުން މަގުމަތިން ފެންނަލެއް އިތުރުވެފައިވާ ކަމަށެވެ. އެހެންކަމުން އެއީ ކޮވިޑް ބަލީގައި ރާއްޖެ ސަލާމަތުގެ އައްސޭރިއަކަށް ދިއުމަށް އެޅިގެން ދާނެ ހުރަހެއް ކަމަށް ޝަރީފް ވިދާޅުވިއެވެ.
ރޭގަނޑު 9:30 ގެ ފަހުން ފިހާރަތަކާއި ކެފޭ ރެސްޓޯރެންޓުތަކުން ހިދުމަތް ދިނުން މަނާ ކޮށްފައި އޮތްއިރު މަނާ ގަޑީގައިވެސް ހުޅުވައިގެން ހިދުމަތްދޭ ފިހާރަތަކާއި ކެފޭ ރެސްޓޯރެންޓުތައް އިތުރުވަމުންދާ ކަމަށް ޝަރީފް ވިދާޅުވިއެވެ.