ޗީފް ޖުޑީޝަލް އެޑްމިނިސްޓްރޭޓަރުގެ މަގާމަށް އާ ބޭފުޅަކު ހަމަޖައްސައިފިއެވެ.
މި މަގާމަށް އާ ބޭފުޅަކު ހަމަޖެއްސުމާއި އެކު ކުރިން އެ މަގާމުގައި ހުންނެވި ޑރ. އަބްދުﷲ ނަޒީރުގެ މަގާމު ވަނީ ގެއްލިފައެވެ. މި މަގާމަށް އަލަށް ހަމަޖެއްސި ބޭފުޅަކީމ.ބަނަފްސާވިލާ، އާއިޝަތު ރިޒުނާ އެވެ. އޭނާއާ ގުޅޭ އިތުރު އެއްވެސް ތަފްސީލެއް ޖުޑީޝަލް އެޑްމިނިސްޓްރޭޝަން (ޑީޖޭއޭ) އިން ހާމައެއް ނުކުރެއެވެ.
ޑީޖޭއޭގެ ޗީފް ޖުޑީޝަލް އެޑްމިނިސްޓްރޭޓަރުގެ މަގާމަށް ކުރިމަތިލުމުގެ ފުރުސަތު ހުޅުވާލާފައި ވަނީ މިދިޔަ ޑިސެމްބަރު މަހުގެ ފަސްވަނަ ދުވަހުއެވެ. ފަސް އަހަރުގެ މުއްދަތަކަށް ހޮވާ ޗީފް ޖުޑީޝަލް އެޑްމިނިސްޓްރޭޓަރުގެ ޖުމްލަ މުސާރައަކީ، 47،500 އެވެ.
ޗީފް ޖުޑީޝަލް އެޑްމިނިސްޓްރޭޓަރުގެ މަގާމަށް އާ ބޭފުޅަކު ހަމަޖައްސާފައި މިވަނީ ޖުޑިޝަލް ސާވިސް ކޮމިޝަން (ޖޭއެސްސީ)ގެ ގާނޫނަށް އިސްލާހު ކުރުމާއިއެކުގައެވެ. ގާނޫނަށް ގެނައި އިސްލާހާ އެކު، ކުރިން ސުޕްރީމްކޯޓުގެ ބެލުމުގެ ދަށުގައި އޮތް ޑީޖޭއޭ މިހާރު ހިންގަމުން އަންނަނީ، ޖޭއެސްސީގެ ދަށުންނެވެ.
އިސްލާހުގައި ވަނީ އެ އިސްލާހަށް އަމަލުކުރަން ފެށުމާއެކު އާ ޗީފް ޖުޑީޝަލް އެޑްމިނިސްޓްރޭޓަރެއް ހަމަޖައްސަން ވާނެ ކަމަށެވެ. އަދި އެ މަގާމަށް ބޭފުޅަކު ހަމަޖެއްސުމާއެކު ކުރިން އެ މަގާމުގައި ހުންނެވި ބޭފުޅާގެ މަގާމު ގެއްލިގެން ދާނެ ކަމަށްވެސް ބުނެފައިވެއެވެ.