ފަތުރުވެރިކަމުގެ ސިނާއަތުން ހަގީގީ ނަފާ ލިބިގެން ދާނީ އެ ސިނާއަތުގެ މަތީ މަގާމުތަކަށް ދިވެހިން ގެނެސްގެން ކަމަށް ޓޫރިޒަމް މިނިސްޓަރު ޑރ. އަބްދުﷲ މައުސޫމް ވިދާޅުވެއްޖެއެވެ.
ރާއްޖޭގެ ފަތުރުވެރިކަން އިސްތިހާރުކޮށް ރާއްޖެއަށް ޒިޔާރަތްކުރާ ފަތުރުވެރިން އިތުރުކުރުމަށް ކުރިއަށްގެންދާ "މޯލްޑިވްސް ބޯޑަރ މައިލްސް" ޕްރޮގްރާމް ރަސްމީކޮށް ލޯންޗްކޮށްދެއްވައި ވާހަކަދައްކަވަމުން މައުސޫމް ވިދާޅުވީ މިއަހަރުގެ ފަތުރުވެރިކަމުގެ ދުވަހުގެ ޝިއާރު ކަމަށްވާ "ފަތުރުވެރިކަމާ ރަށްރަށުގެ ތަރައްގީ" މި ޝިއާރަކީ ރައީސް އިބްރާހިމް މުހައްމަދު ސޯލިހުގެ ސަރުކާރުގެ ސިޔާސަތުތަކާ ވަރަށް ގުޅުންހުރި ޝިއާރެއް ކަމަށެވެ.
ފަތުރުވެރިކަމުގެ ސިނާއަތުގެ ހަގީގީ ނަފާ ދިވެހިންނަށް ލިބިގެން ދާނީ އެ ސިނާއަތާއި ގުޅިލާމެހިފައިވާ އިތުރު ދާއިރާތައްވެސް ފުޅާކޮށްގެން ކަމަށެވެ. އެގޮތުން ފަތުރުވެރިކަމުގެ ސިނާއަތުގައި ހަރަކާތްތެރިވާ ދިވެހި ކަނބަލުންގެ ނިސްބަތްވެސް އިތުރު ކުރަންޖެހޭ ކަމަށާއި ދަނޑުވެރިންނާއި މަސްވެރިންނާއި ފަންނުވެރިންނާއި ފަންނާނުންގެ ބައިވެރިކޮށްގެން ނޫނީ ހަގީގީ މަންފާ ފަތުރުވެރިކަމުގެ ސިނާއަތުން ނުލިބޭނެ ކަމަށް އެމަނިކުފާނު ވިދާޅުވިއެވެ.
ކޮވިޑްގެ ސަބަބުން ރާއްޖޭގެ ބޯޑަރު ބަންދު ކޮށްފައި އޮތުމަށްފަހު އަލުން ބޯޑަރުތައް މިދިޔަ ޖުލައި މަހުގެ 15ވަނަ ދުވަހު ހުޅުވާލުމަށް ރައީސް އިބްރާހީމް މުހައްމަދު ސޯލިހު ނިންމެވި ނިންމެވުމަކީ ވަރަށް މުހިއްމު ނިންމެވުމެއް ކަމަށް މިނިސްޓަރު ފާހަގަކުރެއްވިއެވެ. މިއަހަރަކީ ކޮވިޑްގެ ސަބަބުން ފަތުރުވެރިކަމުގެ ސިނާއަތަށް ބޮޑު ލޮޅުމެއް އައިސްފައިވާ އަހަރެއް ކަމަށް މިނިސްޓަރު މައުސޫމް ވިދާޅުވިއެވެ.
އެހެންނަމަވެސް އަންނަ އަހަރު ދިވެހި ރައްޔިތުން ކުރިމަތިލާނީ ކުރިއެރުންތަކަކާއި އެކު، އިތުރު ކާމިޔާބީތަކެއް ހާސިލު ކުރަން ކަމަށާއި އެކަން ކާމިޔާބުވާނެ ކަމަށް އުއްމީދު ކުރައްވާ ކަމަށް މިނިސްޓަރު މައުސޫމް ވިދާޅުވިއެވެ.