ހދ. ކުޅުދުއްފުށި ސިޓީ އާއި ހއ. ހޯރަފުށި އެއާޕޯޓުގައި ރެސްޓޯރަންޓެއް ތަރައްގީ ކުރުމަށް ނިންމައިފިއެވެ.
މި ދެ އެއާޕޯޓުގައި ރެސްޓޯރަންޓެއް ހަދައި ހިންގުމަށް ޝަޢުގުވެރިވާ ފަރާތްތަކުން އަންނަ މަހުގެ 8 ވާ ބުރާސްފަތި ދުވަހު ރީޖަނަލް އެއާޕޯޓްސް އަށް ވަޑައިގެން މައުލޫމާތު ސާފު ކުރުމަށް އެދޭ ކަމަށް ރީޖަނަލް އެއާޕޯޓުން ކޮށްފައިވާ އިއުލާނުގައިވެއެވެ. އިއުލާނުގައި ބުނީ އެ އެއާޕޯޓުތަކުގައި ރެސްޓޯރަންޓު ގާއިމް ކުރަން ބޭނުންވާ ފަރާތްތަކުން ޕްރޮޕޯސަލް ހުށަހެޅުމަށް ހަމަޖެހިފައި ވަނީ އަންނަ މަހުގެ 20 ވާ އަންގާރަ ދުވަހުގެ 11:00 ގެ ކުރިންނެވެ.
ކުޅުދުއްފުށީ އެއަރޕޯޓް މަޝްރޫޢުގެ ދަށުން 1200 މީޓަރު ދިގު އަދި 30 މީޓަރު ފުޅާ ރަންވޭއަކާއި، ޓެކްސީވޭއާއި، އެއަރ ކްރާފްޓްތައް ޕާކު ކުރުމަށްޓަކާ އޭޕްރަނެއްވެސް ވަނީ ހަދާފައެވެ.
ހޯރަފުށީ އެއަރޕޯޓު ތަރައްޤީކުރުމުގެ މަސައްކަތުގެ ދަށުން 1200 މީޓަރު ދިގު، 35 މީޓަރު ފުޅާ ރަންވޭއަކާއި، 8636 އަކަމީޓަރުގެ އޭޕްރަންއަކާއި، ޓެކްސީވޭއާއި، ސަރވިސް މަގުތައް ތަރައްޤީކުރުމަށް ވަނީ ހަމަޖެހިފައެވެ.