ކުރި އަރާފައިވާ ގައުމުތަކުން ކުދި ގައުމުތަކަށް ދޫކޮށްފައިވާ ލޯނުތައް އަނބުރާ ދެއްކުން އަންނަ އަހަރުގެ ނިޔަލަށް ފަސްކޮށްދިނުމަށް ދިވެހި ސަރުކާރުން ގޮވާލައިފިއެވެ.
އދ. ގެ އާއްމު މަޖިލީހުގެ 75 ވަނަ ބައްދަލުވުމުގެ އާއްމު ބަހުސްގައި ވާހަކަދައްކަވަމުން ކޮވިޑް19 ގެ ސަބަބުން އެތައް ގައުމަކަށް އަސަރު ކޮށްފައިވާ ކަމަށެވެ. ޝާހިދު ވިދާޅުވީ ބައިނަލްއަގުވާމީ ނިޒާމުގެ ތެރޭގައިވާ ތަފާތުތައް، ކޮވިޑް-19 އާއެކު މީގެ ކުރިން ނުފެންނަހާ ފާޅުކަންބޮޑުގޮތެއްގައި ހާމަވެފައިވާ ކަމަށެވެ.
ހުރިހާ ގައުމަކަށް އެއްވަރަށް މިބަލީގެ ސަބަބުން ގެއްލުން ލިބިފައި ނުވި ނަމަވެސް ރާއްޖެ ފަދަ ފަތުރުވެރިކަމުގެ ސިނާއަތަށް ބަރޯސާވެފައިވާ ގައުމަކަށް ލިބުނު ގެއްލުން ގުނާ އަދަދު ނުކުރެވޭހާ ބޮޑު ކަމަށް ޝާހިދު ވިދާޅުވިއެވެ.
"ކުރިމަތިވެފައިވާ އިގުތިސޯދީ އަނދަވަޅުން އަރައިގަތުމަށް މަސައްކަތްތަކެއް ކުރަންޖެހިފައިވާތީ، ޖީ20 ގެ މި ނިންމެވުން 2021 ވަނަ އަހަރުގެ ނިމުމާއި ހަމައަށް ފަސްކޮށްދެއްވުމަށް އެ ގައުމުތަކުގެ ކިބައިން އަޅުގަނޑު އެދެން،" ޝާހިދު ގޮވާލެއްވިއެވެ.
ކޮވިޑް19 ގެ ސަބަބުން ރާއްޖެއަށް ކުރިމަތިވި އިގްތިސޯދީ ގެއްލުންތަކުން އަރައިގަތުމަށް ގައުމުތަކާއި އެކު އެންމެ ބޮޑަށް މަޝްވަރާކޮށް ރާއްޖެ އަށް އެހީ ހޯދުމުގެ މަސައްކަތް އެންމެ ބުރަކޮށް ކުރައްވާ މިނިސްޓަރަކީ ފޮރިން މިނިސްޓަރު އަބްދުﷲ ޝާހިދެވެ. ކޮވިޑާއި ގުޅިގެންވެސް މިހާތަނަށް އެމަނިކުފާނު ވަނީ ގިނަ އެހީތަކެއް ހޯއްދަވާފައެވެ.