ކުރީގެ ނާއިބު ރައީސް އަހުމަދު އަދީބަށް އެމްއެމްޕީއާރްސީ މައްސަލަ އާއި ގުޅިގެން ދައުލަތުން އުފުލި ހަތް ދައުވާ އަށް އެމަނިކުފާނު މިއަދު އިއުތިރާފުވެއްޖެއެވެ.
އެމްއެމްޕީއާރްސީގެ ހިޔާނާތާ ގުޅިގެން، އަދީބުގެ މައްޗަށް ހަތް ދައުވާ އެއް ދައުލަތުން އުފުލިއެވެ. އެ ހަތް ދައުވާ އަކީ ހިޔާނާތްތެރިވުމުގައި ބައިވެރިވުމުގެ ދެ ދައުވާއަކާއި، މަގާމުގެ ނުފޫޒު ބޭނުންކޮށްގެން ނާޖާއިޒު ފައިދާއެއް ހޯދައިދިނުމުގެ ދެ ދައުވާއަކާއި، މަނީ ލޯންޑަރިންގެ ދެ ދައުވާއަކާއި ރަސްމީ ހައިސިއްޔަތު ނަހަމަގޮތުގައި ބޭނުންކުރުމުގެ ދައުވާއެވެ.
މިއަދުގެ ޝަރީއަތުގެ މަޖިލީހުގައި ދައުލަތުން ދައުވާތައް އިއްވައި އަދީބަށް ޖަވާބުދާރީވާން ފަނޑިޔާރު ފުރުސަތު ދެއްވުމުން އަދީބު ވިދާޅުވީ ދައުލަތުން އަދީބަށް ކުރައްވާ ހަތް ދައުވާ އަށް އޭނާ އިއުތިރާފުވެވަޑައިގަންނަވާ ކަމަށެވެ.
އަދީބު ވިދާޅުވީ އެމްއެމްޕީއާރްސީ އިން ގެއްލުނު ފައިސާ ހޯދުމުގައި ދައުލަތަށް އޭނާގެ ފަރާތުން އެއްބާރުލުން މީގެކުރިންވެސް ދީފައިވާ ކަމަށާއި އަދި ކުރިޔަށް އޮތް ތަނުގައި ވެސް އެ އެއްބާރުލުން ދެމުން ގެންދާނެ ކަމަށެވެ.
އަދީބު ވަނީ އޭނާގެ ސިއްހީ ހާލަތާއި ގުޅިގެންވެސް ވާހަކަދައްކަވާފައެވެ. ވިދާޅުވީ އެ މައްސަލަ އާއި ގުޅިގެން މިހާރުވެސް ހަތަރު އަހަރަށްވުރެ ގިނަ ދުވަސް އެކި އަދަބުތަކުގައި އޭނާ އަށް ހޭދަ ކުރެވިފައިވާ ކަމަށެވެ. އެކަމުގެ ސަބަބުން އޭނާ އަށް ސިއްހީ ގޮތުން އެކި މައްސަލަތައް ކުރިމަތިވަމުން އަންނަ ކަމަށް އަދީބު ވިދާޅުވިއެވެ.
އަދީބު ވަނީ މައްސަލާގައި އޭނާ އަށް ދެވެން އޮތް ކުޑަ އަދަބެއް ދެއްވުމަށް ފަނޑިޔާރު ކިބައިން އެދިލައްވާފައެވެ.