އިންޑިއާ ސަރުކާރުން އައްޑޫގައި އަޅާ ޕޮލިސް އެކަޑަމީގެ މަސައްކަތަށް ކޮޗިން އިން އައި މީހުންގެ ތެރެއިން ޕޮޒިޓިވްވި މީހުންނާ ކޮންޓެެެކްޓްވި އެކެޑަމީގައި މަސައްކަތްކުރާ މީހަކު ޕޮޒިޓިވްވުމާއި ގުޅިގެން ޕޮލިސް އެކަޑަމީގެ މަސައްކަތު ސައިޓާއި ތިން ގެއެއް މޮނިޓަރިންގެ ހާލަތަށް ގެނެސްފިއެވެ.
"އައްޑޫލައިވް"އަށް އެނގިފައިވާ ގޮތުގައި މޮނިޓަރިންގެ ހާލަތަށް ގެނެސްފައިވަނީ އެކަޑަމީގެ މަސައްކަތް ކުރާ އިސް މީހުން ތިބުމަށް ކުއްޔަށް މަރަދޫން ނަގާފައިވާ ގެއަކާއި ހިތަދޫން ނަގާފައިވާ ދެ ގެއެވެ. މީގެ އިތުރުން އެމީހުން މަސައްކަތް ކުރާ ސައިޓުވެސް ވަނީ މޮނިޓަރިންގެ ހާލަތަށް ގެނެސްފައެެވެ.
ޕޮލިސް އެކަޑަމީ ސައިޓުން ކޮވިޑު-19 އަށް ޕޮޒިޓިވްވެފައިވަނީ ދޫގަސްގައި ކަރަންޓީނުގައި ތިބި މީހުންގެ ކަންކަން ހަމަޖެއްސުމުގައި ހަރަކާތްތެރިވި މީހެކެވެ. މި މީހާ ޕޮޒިޓިވްވުމާއި ގުޅިގެން ކޮންސްޓަރަކްޝަން ސައިޓުގައި މަސައްކަތް ކުރާ މީހުން ޓެސްޓު ކުރުމަށް އެޗްޕީއޭއިން ނިންމާފައިވާ ކަމަށް މައުލޫމާތު ލިބެއެވެ.
ޕޮލިސް އެކަޑަމީގެ މަސައްކަތަށް ކޮޗިން އިން އައި 128 މީހުންގެ ތެރެއިން 53 މީހަކު މިހާތަނަށް ވަނީ މި ބައްޔަށް ޕޮޒިޓިވް ވެފައެވެ. އެ ހުރިހާ އެންމެންވެސް ތިބީ ގަމުގައި ހުންނަ ދޫގަސް ގައި ކަރަންޓީނު ވެގެންނެވެ.
މި 53 މީހުން ޕޮޒިޓިވް ވުމާއި ގުޅިގެން ހުރިހާ އެންމެން އިތުރު 14 ދުވަހަށް ކަރަންޓީނުކޮށްފައިވާ ކަމަށް އައްޑޫ ހޮސްޕިޓަލުން ބުނެއެވެ. އަދި ޕޮޒިޓިވް އެއްވެސް މީހެއްގެ ފަރާތުން ބަލީގެ އަލާމާތެއް ފެނިފައި ނުވާކަމަށްވެސް ހޮސްޕިޓަލުން ބުނެއެވެ.
އެޗްޕީއޭ އިން އެންމެފަހުން އާންމުކުރި ތަފާސް ހިސާބުތައް ދައްކާ ގޮތުން ރާއްޖޭގެ 24 ރަށެއްގައި 90 އެކްޓިވް ކޭސް އެބަ އުޅެއެވެ. މީގެތެރެއިން ގިނައިން ހިމެނެނީ ހޯމް ކަރަންޓީނުގައި ތިބި މީހުންނެވެ.
ރާއްޖެއިން މިހާތަނަށް 10،000 އަށް ވުރެ ގިނަ މީހުން މި ބައްޔަށް ޕޮޒިޓިވް ވެފައިވާއިރު، 34 މީހަކު ވަނީ މި ބަލީގައި ނިޔާވެފައެވެ.