ކޮވިޑް19 ގެ ސަބަބުން ރާއްޖޭގެ ފަތުރުވެރިކަމަށް ބޮޑު ހީނަރުކަމެއް ކުރިމަތިވެފައި ވާތީ އަލުން ފަތުރުވެރިކަން ކޮޅަށް ޖެހުމުގެ ގޮތުން ރާއްޖެ އިޝްތިހާރު ކުރުމަށް މޯލްޑިވްސް މާކެޓިން އެންޑް ޕަބްލިކް ރިލޭޝަންސް ކޯޕަރޭޝަން (އެމްއެމްޕީއާރްސީ) އިން ސިލްސިލާ ފެމިލިއަރައިޒޭޝަން ދަތުރުތައް އަލުން ފަށައިފިއެވެ.
އެގޮތުން މިފަހަރު ރާއްޖެ އިޝްތިހާރު ކުރުމަށް އައިސްފައި ވަނީ އިންޑިއާގެ ނޫސްވެރިންތަކެކެވެ. މިފަހަރު ރާއްޖެ އިޝްތިހާރު ކުރުމަށް ނިންމާފައި ވަނީ
"ރީޑިސްކަވާ މޯލްޑިވްސް، ދަ ސަނީ ސައިޑް އޮފް ލައިފް" ޝިއާރުގެ ދަށުންނެވެ.
ރާއްޖެ އައިސްފައިވާ އިންޑިއާގެ ނޫސްވެރިން ރާއްޖޭގައި ކުރާ ތަޖުރިބާތަކުގެ ވާހަކަ އިންޑިއާގެ މަގްބޫލު ނޫސްތަކުގައި ޝާއިއު ކުރާނެއެވެ. އޭގެ ތެރޭގައި ދި ޕައިނިޔާ، ޓައިމްސް ޓްރެވަލް، ހިންދުސްތާން ޓްރެވަލްސް އަދި ކޮންޑެނާސްޓް އިންޑިއާ ހިމެނެއެވެ.
މި ނޫސްވެރިން ދެ ރިސޯޓެއްގައި ހަ ދުވަސް ހޭދަކުރާނެއެވެ. ދެ ރިސޯޓުގައި މި ނޫސްވެރިން ކުރާ ތަޖުރިބާގެ ވާހަކަތައް ނޫސްތަކުގައި ލިޔާނެއެވެ. މީގެކުރިންވެސް ގިނަ އަދަދެއްގެ ނޫސްވެރިން ރާއްޖެ އިޝްތިހާރު ކުރުމަށް ވަނީ ރާއްޖެ އައިސްފައެވެ.