ކޮވިޑް19 ގެ ސަބަބުން ރާއްޖޭގެ ބޯޑަރު ބަންދުކޮށްފައި ބެހެއްޓުމަށްފަހު އަލުން ބޯޑަރު ހުޅުވާލި ފަހުން ވެލާނާ އިންޓަނޭޝަނަލް އެއަރޕޯޓަށް ޖެއްސި އަދި ފުރި ފްލައިޓްތަކުގެ އަދަދު މިދިޔަ އާދީއްތަ ދުވަހު ރެކޯޑު އަދަދަކަށް އިތުރުވެއްޖެއެވެ.
ވީއައިއޭ ހިންގާ މޯލްޑިވްސް އެއާޕޯޓްސް ކޮމްޕެނީ ލިމިޓެޑް އިން އާއްމު ކޮށްފައިވާ ތަފާސް ހިސާބުތައް ދައްކާ ގޮތުގައި އިއްޔެ ވީއައިއޭ އަށް ޖެއްސި އަދި ފުރި ފްލައިޓުތަކުގެ އަދަދު އުޅެނީ 147 ގައެވެ.
ރަންވޭގެ 39 ފުލައިޓު މޫވްމަންޓާއި، ސީޕްލޭންގެ 108 އެއާ ޓްރެފިކް މޫވްމަންޓު މީގެ ތެރޭގައި ހިމެނެއެވެ. މިދިޔަ ޖުލައި މަހުގެ 15ވަނަ ދުވަހު ރާއްޖޭގެ ބޯޑަރުތައް ހުޅުވާލި ފަހުން މިހާތަނަށް ރާއްޖޭގެ ގައުމީ އެއާލައިން މޯލްޑިވިއަން ވެސް ހިމެނޭހެން 10 އެއާލައިން އަކުން ދަނީ ރާއްޖެ އަށް ދަތުރު ކުރަމުންނެވެ.
އެންމެ ގިނަ ފަތުރުވެރިން މިހާތަނަށް ރާއްޖެ އައިސްފައި ވަނީ ގަތަރު އެއާލައިން އިންނެވެ. އެ އެއާލައިން އިން ވަނީ މިދިޔަ މަހުގެ ނިޔަލަށް 60 ފްލައިޓު ހަމައެކަނި ރާއްޖެ އަށް ބާއްވާފައެވެ. އެ ފްލައިޓުތަކުގައި 4566 ފަތުރުވެރިން ވަނީ އައިސްފައެވެ.
ދެވަނަ އަށް އެންމެ ގިނަ ފަތުރުވެރިން ރާއްޖެ އައިސްފައި ވަނީ އެމިރޭޓްސް އިންނެވެ. އެ އެއާލައިން އިން 50 ދަތުރު ރާއްޖެ އަށް ކޮށްފައިވާއިރު 4058 ފަތުރުވެރިން ވަނީ ރާއްޖެ އަށް ޒިޔާރަތްކޮށްފައެވެ.