އިންޑިއާ އިން ރާއްޖެ އަށް ޒިޔާރަތް ކުރާ ފަތުރުވެރިންގެ އަދަދު އިތުރު ކުރުމަށް ވެބިނާއެއް ބާއްވައިފިއެވެ.
މި ވެބިނާ އަކީ އިންޑިއާ ހައިކޮމިޝަނުން އިންތިޒާމު ކޮށްގެން ބޭއްވި ވެބިނާއެކެވެ. އެގޮތުން މި ވެބިނާ ފެށުމުގެ ގޮތުން ޓޫރިޒަމް މިނިސްޓަރު ޑރ. އަބްދުﷲ މައުސޫމާއި އިންޑިއާ ހައިކޮމިޝަނަރު ސަންޖޭ ސުދީރުގެ އިތުރުން މޯލްޑިވްސް މާކެޓިން އެންޑް ޕަބްލިކް ރިލޭޝަންސް ކޯޕަރޭޝަން (އެމްއެމްޕީއާރްސީ) ގެ މެނޭޖިން ޑިރެކްޓަރު ތައްޔިބު މުހައްމަދު ވެސް ބައިވެރިވެވަޑައިގަތެވެ.
މި ވެބިނާގައި މޯލްޑިވްސް އެސޯސިއޭޝަން އޮފް ޓްރެވަލް އޭޖެންޓްސް އެންޑް ޓުއާ އޮޕަރޭޓާޒް (މަޓާޓޯ) އާއެކު އިންޑިއާގެ ގިނަ އެސޯސިއޭޝަންތަކުން ބައިވެރިވިއެވެ.
އިންޑިއާ ފަތުރުވެރިން އިތުރު ކުރުމަށް ވެބިނާއެއް ބޭއްވިއިރު އެމްއެމްޕީއާރްސީ އިން އަންނަނީ އިންޑިއާގައި ރާއްޖެ އިޝްތިހާރު ކުރުމުގެ މަސައްކަތްތައް ކުރަމުންނެވެ. މީގެއިތުރުން ރާއްޖެ އިޝްތިހާރު ކުރުމަށް އިންޑިއާގެ ފަސް ނޫސްވެރިއަކު ވެސް ވަނީ ދާދިފަހުން ރާއްޖެ އައިސްފައެވެ.
ކޮވިޑް19 ގެ ސަބަބުން ރާއްޖޭގެ ބޯޑަރު ބަންދު ކުރުމަށްފަހު އަލުން ބޯޑަރު ހުޅުވާލާފައި ވަނީ މިދިޔަ ޖުލައި މަހުގެ 15ވަނަ ދުވަހުއެވެ. އިންޑިއާ އަކީ މިދިޔަ އަހަރު ރާއްޖެ ޒިޔާރަތްކުރި ފަތުރުވެރިންގެ ތެރެއިން އެންމެ ގިނައިން ދެވަނަ އަށް އެންމެ ގިނަ ފަތުރުވެރިން ޒިޔާރަތްކުރި ގައުމެވެ.