ކުރީގެ ޓޫރިޒަމް މިނިސްޓަރު އަލީ ވަހީދަށް ކުރާ ޖިންސީ ގޯނާގެ ތުހުމަތުތަކާއި ގުޅޭ މައްސަލައިގެ ތަހުގީގު ފުރިހަމަ ކުރުމަށް ފަހު ދައުވާ ކޮށްދިނުމަށް ޕްރޮސިކިއުޓަރު ޖެނެރަލް އޮފީހަށް ފޮނުވައިފިއެވެ.
މި މައްސަލާގައި ފުލުހުން މިދިޔަ މަހުގެ 23ވަނަ ދުވަހު ބުނެފައިވަނީ އެ މައްސަލައިގެ ތަހުގީގު ފުރިހަމަ ކުރުމަށް ޕީޖީ އާއެކު މަޝްވަރާ ކުރަމުން އަންނަ ކަމަށެވެ. މިއަދު ފުލުހުން ބުނީ އިސްލާހު ކުރަންޖެހޭ ކަންކަން އިސްލާހު ކުރުމަށްފަހު އެ މައްސަލާގައި އަލީ ވަހީދުގެ މައްޗަށް ދައުވާ ކޮށްދިނުމަށް އެދި ޕީޖީ އޮފީހަށް ފޮނުވާފައިވާ ކަމަށެވެ.
މި މައްސަލާގައި އަލީ މިދިޔަ ޖުލައި މަހުގެ 19ވަނަ ދުވަހު އަލީ ވަހީދު ވަނީ ފުލުހުންގެ އިދާރާ އަށް ހާޒިރުކޮށް ބަޔާންވެސް ނަގާފައެވެ. ފުލުހުން ވިދާޅުވީ އަލީ ވަހީދުގެ މައްސަލައިގެ ތަހުގީގު ފުރިހަމަ ކުރުމުގެ މަސައްކަތް ޕީޖީގެ މަޝްވަރާއާ އެކު ކުރިޔަށްދާ ކަމަށެވެ.
މި ތުހުމަތުތަކާއެކު އަލީ ވަހީދު މަގާމުން ވަކިކުރައްވާފައިވާއިރު، ފުލުހުން ވަނީ އޭނާ ދިރިއުޅުއްވާ ގެ ބަލައިފާސްކުރުމަށްފަހު ފޯނާއި ލެޕްޓޮޕް ފުލުހުންގެ ބެލުމުގެ ދަށަށް ގެންގޮސްފައެވެ. އަދި އަލީ ވަހީދުގެ ޕާސްޕޯޓު ވެސް މިހާރު ވަނީ ހިފަހައްޓާފައެވެ.
އަލީ ވަހީދާއި ގުޅޭ މައްސަލަ ފުލުހުން ތަހުގީގު ކުރަމުންދާއިރު، ޓުއަރިޒަމް މިނިސްޓްރީގައި އޭނާ ހިންގާފައި ޖިންސީ ފުރައްސާރައިގެ މައްސަލަތަކާ ގުޅޭ ޝަކުވާ އެމިނިސްޓްރީގެ މުވައްޒަފުންތަކެއް ވަނީ ރައީސް ސޯލިހުގެ އިތުރުން ޖެންޑަރ މިނިސްޓްރީ އަށް ވެސް ހުށަހަޅާފައެވެ.