މާލެ ފިޔަވައި ރާއްޖޭގެ އެންމެ ބޮޑު އާބާދީގައި މީހަކު ރޭގަނޑު ދަންވަރު ބަލިވެއްޖެ ނަމަ ބޭސް ނުލިބޭ ބުނުމުން ގިނަ މީހުން ހައިރާންވާނެ އެވެ. އެކަމަކު މިއީ ހަގީގަތެވެ.
ހިތަދޫ ރީޖަނަލް ހޮސްޕިޓަލަށް ރޭގަނޑު ދަންވަރު ބަލިވެގެން ގެންނަ މީހަކަށް ޑޮކްޓަރު ލިޔެދޭ ބޭސް ލިބޭނެ ގޮތެއް ނެތެވެ.
އެކަމަކު ހިތަދޫ ރީޖަނަލް ހޮސްޕިޓަލްގެ ގޯތިތެރޭގައި ސަރުކާރުގެ ހިއްސާވާ އެސްޓީއޯގެ ބޭސް ފިހާރައެއް ހުރެ އެވެ.
ހިތަދޫ ރީޖަނަލް ހޮސްޕިޓަލް ހިންގެވުމާ ހަވާލުވެ ހުންނެވި ހަދީޖާ ހަފްސާ ވިދާޅުވީ ރޭގަނޑު ދަންވަރު ބަލިވެގެން ޑޮކްޓަރަށް ދައްކާ ފަރާތްތަކަށް ބޭސް ނުލިބުމުގެ ޝަކުވާ ވަރަށް ގިނައިން ލިބެމުން އަންނަ ކަމަށެވެ.
"އަޅުގަނޑުމެންނަށް މިހާރު ވަރަށް ގިނައިން ލިބޭ ޝަކުވާއެއް ދަންވަރު ބޭސް ނުލިބުމުގެ ޝަކުވާއަކީ،" އޭނާ ވިދާޅުވި އެވެ.
ހަފްސާ ވިދާޅުވީ ހޮސްޕިޓަލް ގޯތިތެރޭގައި ހުންނަ އެސްޓީއޯ ބޭސް ފިހާރަ ހުޅުވައިދިނުމަށް ލިއުމުންވެސް މިހާރު އެދިފައިވާނެ ކަމަށެވެ.
ހޮސްޕިޓަލް ވަށައިގެން 4 ބޭސް ފިހާރަ ހުރި އިރު އެންމެ ބޭސް ފިހާރައެއް ވެސް ދަންވަރު ގަޑީގައި ހުޅުވާފައި ނުހުރެ އެވެ.
ޢާސަންދައިން ބޭސް ލިބެން ނެތުމާއި، އާއްމު ބައެއް ބޭސްތައް ބަރާބަރަށް ނުލިބުމާ ގުޅިގެން އާއްމުންގެ ކަންބޮޑުވުން އިތުރުވެފައި ވަނިކޮށް އެސްޓީއޯ އިން ހިތަދޫގައި ބޭސް ފިހާރައެއް ހުޅުވުމާއި ގުޅިގެން އާއްމުންނަށް އިތުރު އުއްމީދެއް ލިބިގެން ދިޔަ އެވެ.
ހާއްސަކޮށް އެސްޓިއޯ ބޭސް ފިހާރަ ހުޅުވުމަށް ފަހު ކުޑަ ދުވަސްކޮޅެއްގެ ތެރޭގައި 24 ގަޑި އިރުގެ ހިދްމަތް ފޯރުކޮސްދޭނެކަމަށް ބުނުމުން އާއްމުންގެ ހިތްހަމަޖެހުން އިތުރުވެގެން ދިޔައެވެ.
ހިތަދޫ ރީޖަނަލް ހޮސްޕިޓަލް ސަރަހައްދުގައިވާ ގިނަ ބޭސްފިހާރަތަކަކީ ގްރޭޑް 1ގެ ފެންވަރުގައި ހުއްދަދީފައިވާ ތަންތަނެވެ. އެހެން ކަމުން އެތަންތަން 24 ގަޑި އިރު ހުޅުވަން ޖެހެ އެވެ. ނަމަވެސް އާއްމު އެތައް ބަޔަކު ބޭސް ނުލިބިގެން އުޅޭ އިރު މިފަދަ ތަންތަން ބަންދުކޮށްފައި ބެހެއްޓުމަކީ ކަންބޮޑުވާ ކަމެކެވެ.
ހާއްސަކޮށް އެއްވެސް ކުއްޔެއް ނެތި ހިތަދޫ ރީޖަނަލް ހޮސްޕިޓަލް ގޯތި ތެރޭގައި ހުޅުވާފައިވާ އެސްޓިއޯ ބޭސް ފިހާރައިން 24 ގަޑި އިރު ހިދްމަތް ލިބެން ނެތުމަކީ ކަންބޮޑުވާ މައްސަލައެކެވެ. މިކަމަށް އަވަސް ދާއިމީ ހައްލެއް ބޭނުންވެ އެވެ.