ރޭ ދަންވަރު ލ. ވަޑިނޮޅި ކައިރީ އެން ހިފަން އުޅެނިކޮށް ތޫނު އެއްޗެއްސާއި އެކު އަރައި ހައިޖެކް ކުރި "ފަސްކުރި" ދޯނި، ލ. ގަމަށް ގެންދިޔައީ އެ ދޯނީގެ ކެޕްޓަނަށް ވަޅިން ބިރު ދައްކައިގެން ކަމަށް އެ ދޯނީގެ ފަޅުވެރިން ބުނެފިއެވެ.
އެ ދޯނިން "އައްޑޫލައިވް"އަށް މައުލޫމާތު ދިން ފަޅުވެރިއަކު ބުނީ ތޫނު އެއްޗެއްސާއި އެކު އެރި މީހުން އެންމެ ފުރަތަމަވެސް ހޯދީ ދޯނީގެ ކެޕްޓަން ކަމަށެވެ. އަދި ކެޕްޓަނަށް ވަޅިން ބިރު ދައްކައި ދޯނި ލ. ގަމަށް ދިއުމަށް އެންގި ކަމަށެވެ.
"ވަޅި، ކަތިވަޅި، ކަނޑި ހިފައިގެން އެމީހުން އައިސް ދޯންޏަށް އެރީ، ވާނުވާއެއްވެސް ނޭގޭ، އެމީހުން އައިސް ހޯދީ ކެޕްޓަން، ދޯނި ގަމާއި ހަމައަށް އައީވެސް އެމީހުން ވަޅިން ބިރު ދައްކައިގެން " ފަޅުވެރިޔާ ބުންޏެވެ.
ފަޅުވެރިޔާ ބުނީ ތޫނު އެއްޗެހި ހިފައިގެން އެރި މީހުން އެންމެންނަށް ބިރު ދައްކައި އެންގީ އެމީހުން ބުނާ ގޮތަށް ހެދުމަށެވެ. އެގޮތުން ދޯނި ވަގުތުން ލ. ގަމަށް ދިއުމަށް އެމީހުން އެންގިއެވެ.
"އެމީހުންގެ ވާހަކަ ތަކުން އެނގުނު އެއީ ދޯނި އަތުލަން އައި ބައެއް ކަން، އިތުރު މާބޮޑު ތަފްސީލެއް އެމީހުން ނުދޭ"
ފަޅުވެރިޔާ ބުނި ގޮތުގައި ދޯންޏަށް އެމީހުން ފާރަލަމުން އައިސްފައިވަނީ އިއްޔެ ހަވީރު މާންދޫން މަސްކިރުވައިގެން ނިކުތް ހިސާބުންނެވެ. އަދި އެދޯނި ފެނޭތޯ ހޯދަމުން ދަނިކޮށް ދޯނި އޮތް ލޮކޭޝަން ދިނީ އެހެން މަސް ދޯންޏަކުން ކަމަށް ހަތިޔަރާއި އެކު ދޯންޏަށް އެރި މީހުން ވަނީ ބުނެފައެވެ.
"ފަސްކުރި" ދޯންޏަކީ މީގެ ދެ އަހަރު ކުރިން ލ.ގަމު މީހަކު ޔޮޓް ޓުއާސްއަށް 7 މިލިއަން ރުފިޔާއަށް ވިއްކާފައިވާ ދޯންޏެކެވެ. އެ ދޯނީ ވިއްކި މީހާ އާޢި ހަވާލާދީ "ވަގުތު" ނޫހުން ބުނެފައިވަނީ ލ. އަތޮޅަށް ދޯނި ވަނުމުން ސުލްހަވެރިކަމާއި އެކު ދޯންޏަށް އަރައި، ދޯންޏާއި ހަވާލުވެފައިވާ ކަމަށެވެ. އަދި ދޯނި ހައިޖެކް ކުރި ވާހަކަ އޭނާ ދޮގު ކުރެއެވެ.
ނަމަވެސް ދޯނީގެ ފަޅުވެރިން އެވާހަކަ ދޮގު ކުރެއެވެ. ދޯނީގެ ފަޅުވެރިން ބުނީ ގާތްގަޑަކަށް 30 މީހުންގެ ބޮޑު ގްރޫޕަކުން ދޯންޏަށް އެރީ ތޫނު ހަތިޔާރާއި އެކު ކަަމަށެވެ. އަދި އެއީ ބިރުވެރި ވަގުތުކޮޅެއް ކަމަށް އެމީހުން ބުނެއެވެ.
މި ހާދިސާ އާއި ގުޅިގެން ފުލުހުންގެ މީޑިއާ އޮޕިޝަލް ވިދާޅުވީ ރޭ 11:55 ހާއިރު ވަޑިނޮޅު ކައިރީގައި އޮތް މަސް ދޯންޏެއް ބަލާ ލޯންޗެއްގައި ބަޔަކު ދިޔަ ކަމުގެ މައުލޫމާތު ލިބިފައިވާ ކަމަށެވެ. އެ ދޯނި ގަމު ތުނޑި އަށް ކައިރިކޮށް، އެ އަށް އިތުރު ބަޔަކު އެރިއަސް އެއްވެސް މާރާމާރީއެއް ހިންގާފައިވާ ނުވާ ކަމަށް ބުންޏެވެ.
"އެހެން ނަމަވެސް ދޯންޏަށް ގެންދިޔަ ކަމަށް ބެލެވޭ ތޫނު އެއްޗެހި ދޯނި ތެރޭ ހުރުމުން އެ ތަކެތި ފުލުހުންގެ ބެލުމުގެ ދަށަށް ގެނެސްފައިވޭ،"
އިތުރަށް ފުލުހުން ބުނެފައިވަނީ މި މައްސަލަ ތަހްގީގު ކުރަމުން އަންނަ ކަމަށެވެ.