ސ. މިދޫ މެޖިސްޓްރޭޓް ކޯޓްގެ އިސް މެޖިސްޓްރޭޓް ޝެއިހް މުހައްމަދު ތޮއްޔިބްގެ އަތް މިއަދު ބިންދައިގެން ގޮސްގެން އެކްސް ރޭ ނަގަން މިރޭ ސ. ހިތަދޫ ރީޖަނަލް ހޮސްޕިޓަލަށް ގެންގޮސްފި އެވެ.
އެނގިފައިވާ ގޮތުގައި ޝެއިހް ތޮއްޔިބްގެ އަތް ބިންދައިގެން ގޮސްފައި ވަނީ މިއަދު ހަވީރު ފުޓްބޯޅަ ކުުޅުއްވަނިކޮށެވެ. ބިންދައިގެން ގޮސްފައި ވަނީ އޭނާގެ ކަނާއަަތެވެ.
މީދޫ ދޮންދީދީމަންޒިލް ތޮއްޔިބަކީ މި އަހަރުގެ ޖެނުއަރީގައި މީދޫ މެޖިސްޓްރޭޓް ކޯޓާ ހަވާލުވެ ވަޑައިގެންނެވި ބޭފުޅެކެވެ.
ހިތަދޫ ހޮސްޕިޓަލަށް އެކްސް ރޭ ނަގަން ތޮއްޔިބް މިރޭ ކުއްޔަށް ލޯންޗެއްގައި ނަންގަވައިގެން ވަޑައިގެންފައި ވަނީ 8:00 ޖަހާ އެހާކަށްހާ އިރު އެވެ.
ތޮއްޔިބް އާ އެކު މިރޭ ހިތަދު އައި މީހަކު "އައްޑޫ ލައިވް" އާ ވާހަކަ ދައްކަމުން ބުނީ އެ މީހުން ހުޅުމީދޫން ފޭދު އަށް އައީ ހައި އެނާޖީގެ ލޯންޗެއް ކުއްޔަށް ހިފައިގެން ކަމަށެވެ. ލޯންޗުން ކޮޅަކަށް 2،500ރ. ދައްކަން ޖެހެ އެވެ.
"އަނެއްކޮޅުން ފޭދޫން ހިތަދު އަށް ދާން ޓެކްސީއަކަށް އަނެއްކާ ބޮޑު ހަރަދެއް ކުރަން އެބަ ޖެހޭ. އާސަންދަ ލިބުމުގައި ވެސް ހުޅުމީދޫ ސިއްހީ މަރުކަޒުގައި ވަރަށް ގިނަ ދަތިތަކެއް އެބަ ހުރި،" އޭނާ ބުންޏެވެ. "ހޮސްޕިޓަަލަށް އައިސް ޕްލާސްޓަރު އަޅަން މަޑުކޮށްލައިގެން މިހާރު މި ތިބީ. ނިމިގެން އަނެއްކާ ރަށަށް ފުރާ ގޮތަށް."
ހުޅުމީދޫ މީހުން އިމަޖެންސީގައި ހިތަދޫ ރީޖަނަލް ހޮސްޕިޓަލަށް އަންނަން ވެއްޖެ ނަމަ ކުރަން ޖެހޭ ހޭދަ ބޮޑުވުމަކީ އެ ރަށުގެ ރައްޔިތުން އާންމުކޮށް ކުރާ ޝަކުވާއެކެވެ.
އެކަށީގެންވާ ގޮތަކަށް ފެރީ ނިޒާމުގެ ހިދުމަތް ނެތުމާއި ހުޅުމީދޫ ސިއްހީ މަރުކަޒުން ފަރުވާ ވެސް ލިބެން ނެތުމުން ބޮޑު ތަކުލީފެއް އާންމުން އުފުލަން ޖެހެ އެވެ.