ރާއްޖޭގައި ތިބި އިންޑިއާ ސިފައިންގެ އަދަދު ޑިފެންސް މިނިސްޓްރީން ހާމަ ނުކުރި މައްސަލަ ހައި ކޯޓަށް ހުށަހަޅާނެކަމަށް މައުލޫމާތު ހޯދުމަށް ޑިފެންސް މިނިސްޓްރީއަށް ހުށަހެޅި ދިޔަރެސް ނޫހުން ބުނެފިއެވެ.
މައުލޫމާތު ހޯދައި ލިބިގަތުމުގެ ގާނޫނުގެ ދަށުން ދިޔަރެސް ނޫހުން ވަނީ ރާއްޖޭގައި ތިބި އިންޑިއާ ސިފައިންގެ އަދަދާއި، އެމީހުންނަށް ކުރާ ހަރަދު ތަފްސީލު ހޯދުމަށް ޑިފެންސް މިނިސްޓްރީއަށް ހުށަހަޅާފައެވެ. ނަމަވެސް ޑިފެންސް މިނިސްޓްރީން ބުނެފައިވަނީ އެމައުލޫމާތަކީ ރާއްޖޭގެ ސަލާމަތަށް ނުރައްކާވެދާނެ މައުލޫމާތެއް ކަމަށް ބުނެ ޑިފެންސް މިނިސްޓްރީން ވަނީ މައުލޫމާތު އެނޫހަށް ނުދީފައެވެ.
މި މައްސަލަ އިންފޮމޭޝަން ކަމިޝްނާސް އޮފީސް( އައިކޮމް) އަށް ހުށަހެޅުމުން އެއޮފީހުން ވަނީ ޑިފެންސް މިނިސްޓްރީ އާއި ދިޔަރެސް ނޫހާއި އެކު ދެ އަޑު އެހުމެއް ބާއްވާފައެވެެ. އެގޮތުން އިއްޔެ ބޭއްވި އަޑު އެހުމުގައި ޑިފެންސް މިނިސްޓްރީން ވަނީ އެ މައުލޫމާތު ހިއްސާ ނުކުރެވޭނެކަމަށް ބުނެފައެެވެ. އަދި ޑިފެންސް މިނިސްޓްރިގެ ވާހަކަތަކަށް އައިކޮމްއިން ވަނީ ތާއިދުކޮށްފައެވެ.
ދިޔަރެސް ނޫހުގެ ފަރާތުން އަހުމަދު އަޒާން މަރުޒޫގު ވަނީ މައުލޫމާތު ނުދިން މައްސަލަ ހައިކޯޓަށް ހުށަހަޅާނެކަމަށް ބުނެފައެެވެ. އަދި މިކަމާއި އެހީތެރިވެދޭނެ ގާނޫނީ ވަކީލަކު ބޭނުންކަމަށް އަޒާން ވަނީ ބުނެފައެވެ.
އިއްޔެގެ އަޑުއެހުން ނިންމަވާލަމުން އިންފޮމޭޝަން ކަމިޝްނާ ހުސެއިން ފިޔާޒު މޫސާ ވިދާޅުވީ ނިންމުމާއި މެދު ހިތްހަމަ ނުޖެހޭނަމަ އެ މައްސަލަ އިސްތިއުނާފު ކުރުކުގެ ހައްޤު އެ ނޫހަށް ލިބިގެންވާ ކަމަށެވެ.
މައުލޫމާތު ހޯދައި ލިބިގަތުމުގެ ގާނޫނުގެ ދަށުން މައުލޫމާތު ހޯދަން އެދޭ ފަރާތައް ހައި ކޯޓު އަދި އޭގެ ފަހުން މައްސަލަ ސުޕްރީމު ކޯޓަށް ހުށަހެޅޭނެ ފުރުސަތު ލިބެއެވެ.