އައްޑޫ އިކުއިޓޯރިއަލް ހޮސްޕިޓަލް (އޭއީއެޗް) ގައި މިވަގުތު އެކަށީގެންވާ މިންވަރަށް ޑޮކްޓަރުން ނެތްކަމަށާއި، ފެންވަރު ރަނގަޅު ޑޮކްޓަރުން ހޯދުމަށް މަސައްކަތް ކުރަމުން އަންނަ ކަމަށް އާ ސީއީއޯ ޑރ. މުހައްމަދު ސޯލިހު ވިދާޅުވެއްޖެއެވެ.
އޭއީއެޗްގެ ސީއީއޯ ކަމާއި ހަވާލުވެވަޑައިގެން އައްޑޫ ސިޓީ ކައުންސިލާއި އެކު އިއްޔެ ބޭއްވި ފުރަތަމަ ބައްދަލުވުމުގައި ޑރ. ސޯލިހު ވިދާޅުވީ މިވަގުތު ހޮސްޕިޓަލުގައި ތިއްބެވި ޑޮކްޓަރުންގެ ތެރެއިން އެކަށީގެންވާ ފެންވަރު ނެތް ޑޮކްޓަރުން ބަދަލުކުރުމުގެ މަސައްކަތް މިހާރު ފަށާފައިވާ ކަމަށެވެ. އަދި ހޮސްޕިޓަލަށް ދިވެހި ގިނަ ޑޮކްޓަރުން ބޭނުންވާ ކަމަށް ޑރ. ސޯލިހު ވިދާޅުވިއެވެ.
އައްޑޫ ހުޅުދޫއަށް އުފަން ޑރ. ސޯލިހު ވިދާޅުވީ ހޮސްޕިޓަލަށް ބޭނުންވާ ހާއްސަ ޑޮކްޓަރުން ރާއްޖެއިން ބޭރުން ގެނައުމަށް މަސައްކަތް ކުރައްވަމުން އަންނަ ކަމަށެވެ. އަދި މި މަސައްކަތަށް 3 މަސް ދުވަސް ނަގާނެ ކަމަށް ޑރ. ސޯލިހު ވިދާޅުވިއެވެ.
15 އަހަރުވަންދެން ޞިއްޙީ ދާއިރާގެ ހިންގުމުގެ މަތީ ފަންތީގައި މަސައްކަތްކުރައްވާފައިވާ ޑރ. ސޯލިހު ވިދާޅުވީ ރައްޔިތުންނަށް ބޭނުންވާ ރަނގަޅު ފެންވަރެއްގެ ހިދްމަތެއް ދިނުމަށް ހޮސްޕިޓަލްގެ މިހާރުގެ އޮނިގަނޑަށް ބޮޑެތި ބަދަލުތަކެއް ގެންނަން ޖެހޭ ކަމަށެވެ. އެގޮތުން އެޕޮއިންޓްމަންޓް ހެއްދުމަށް ހިލޭ ގުޅޭ ހަތަރު ނަންބަރުގެ ޚާއްޞަ ފޯނު ނަންބަރެއްވެސް ތަޢާރަފްކުރުމަށް ތައްޔާރުވެފައިވާ ކަމަށްވެސް ޑރ. ސޯލިހު ވިދާޅުވިއެވެ.
މީގެ އިތުރުން ކުރިއަށް އޮތް ތަނުގައި ހޮސްޕިޓަލުގެ ޑޮކްޓަރުން ތާވަލްކޮށްގެން ޞިއްޙީ މަރުކަޒުތަކަށް ބަލިމީހުން ބެއްލެވުމަށް ޒިޔާރަތްކުރައްވާ ގޮތަށް ހަމަޖެހިގެންދާނެ ކަމަށްވެސް ޑރ. ސޯލިހު ވިދާޅުވިއެވެ.
އޭއީއެޗަކީ ދެކުނުގެ ހަތަރު އަތޮޅުގެ ރައްޔިތުންނަށް ސިއްހީ ހިދްމަތް ފޯރުކޮށްދިނުމަށް އެންމެ ފަހުގެ ވަސީލަތްތަކާއި އެކު ހަދާފައިވާ ހޮސްޕިޓަލެކެވެ. މިހާރުވެސް ހުވަދޫ، ފުވައްމުލަކުގެ ގިނަ ބަޔަކު އަންނަނީ އޭއީއެޗްއިން ހިދްމަތް ހޯދަމުންނެވެ.