ކޮވިޑު-19 އާއި ގުޅިގެން ލަސް ކުރެވިފައިވާ ލޯކަލް ކައުންސިލް އިންތިހާބު އަންނަ މާޗު މަހު 6 ވަނަ ދުވަހު ބޭއްވުމަށް މަސައްކަތް ކުރަމުން އަންނަ ކަމަށް އިލެކްޝަން ކަމިޝަންއިން ބުނެފިއެވެ.
ރޭ ރާއްޖެ ޓީވީ "ފަލަ ސުރުހީ" ޕްރޮގްރާމްގައި ވާހަކަފުޅު ދައްކަވަމުން އިލެކްޝަން ކަމިޝަންގެ ރައީސް އަހުމަދު ޝަރީފު ވިދާޅުވީ ފަސް ކުރެވިފައިވާ ލޯކަލް ކައުންސިލް އިންތިާބާއި، އަންހެނުންގެ ތަރައްޤީއަށް މަސައްކަތް ކުރާ ކޮމެޓީގެ އިންތިހާބު މާޗު 6 ވަނަ ދުވަހު ބޭއްވުމަށް ތައްޔާރު ވަމުން އަންނަ ކަމަށެވެ.
ޝަރީފު ވިދާޅުވީ މާޗު 6 ވަނަ ދުވަހަކީ އަދި ރަސްމީކޮށް އިންތިހާބު ބާއްވާނެ ތާރީހުކަމަށް އިލެކްޝަނުން ނުނިންމާކަމަށެވެ. ނަމަވެސް އެތާރީހުގައި އިންތިހާބު ބޭއްވޭތޯ މަސައްކަތް ކުރަމުން އަންނަ ކަމަށެވެ.
ކޮވިޑު-19 އާއި ގުޅިގެން ރާއްޖޭގައި ސިއްހީ ކުއްލި ނުރައްކަލުގެ ހާލަތު އިއްލާން ކުރުމާއި ގުޅިގެން މިއަހަރު އެޕްރީލް މަހު ބާއްވަން ނިންމި އިންތިހާބު ވަނީ ވަކި މުއްދަތެއް ކަނޑަނާޅައި ފަސްކޮށްފައެވެ. އަދި މިކަމާއި ގުޅިގެން ދިމާވި ގާނޫނީ މައްސަލައަށް ރައްްޔިތުންގެ މަޖިލީހުން ވަނީ ވަގުތީ ހައްލެއް ހޯދައިދީ މިހާރު ތިބި ކައުންސިލް ތަކުގެ ދައުރު އިންތިހާބު ބޭއްވެންދެން ކައުންސިލަރުންގެ ގޮތުގައި ތިބެވޭނެ ގޮތަށް ގާނޫނު އިސްލާހުކޮށްފައެވެ.
2021 ވަނަ އަހަރަށް ލަފާކުރި ބަޖެޓުގައި ލޯކަލް ކައުންސިލް އިންތިހާބަށް 49.18 މިލިއަން ރުފިޔާ ވަނީ ހިމަނާފައެވެ. މިއީ މިދިޔަ އަހަރު ބާއްވަން ނިންމި އިންތިހާބުގެ ބަޖެޓަށްވުރެ 31.5 މިލިއަން އިތުރު އަދަދެކެވެ.
ކައުންސިލް އިންތިޚާބުގައި ވާދަކުރުމަށް ސިޔާސީ ޕާޓީތަކާއި އަމިއްލަ ގޮތުން 4،172 އަށް ވުރެން ގިނަ މީހުން ކުރިމަތިލާފައިވާއިރު، މިހާތަނަށް 71 އަށް ވުރެން ގިނަ ކެންޑިޑޭޓަކު ވަނީ ނަން އަނބުރާ ނަގައިފަ އެވެ.
އިލެކްޝަނުން ބުނީ އިންތިހާބުގެ ތާރީހު ކަނޑައަޅާނީ ކެންޑިޑޭޓުންނަށް ގާނޫނުގައި ބުނާ މުއްދަތު ކެމްޕެއިން ކުރުމަށް ލިބޭ ގޮތަށްކަމަށެވެ.