އިލެކްޝަން ކަމިޝަންގެ ރައީސް ފުވާދު ތައުފީގުގެ ބަރަހަނާ ވީޑިއޯއެއް ގެންގުޅޭ ކަމުގެ އަޑުތަކެއް ފެތުރިއްޖެ އެވެ.
ފުވާދު އާ ގުޅޭ ގޮތުން މިފަދަ އަޑުތަކެއް ފެތުރިފައި މި ވަނީ މިއަދު ފުލުހުން ހިންގި ހާއްސަ އޮޕަރޭޝަނެއްގައި ހިތަދޫގެ ތިން ގެއެއް ބަލައި ޗެކް ކުރުމަށް ފަހު ބައެއް ސާމާން ފުލުހުންގެ ބެލުމުގެ ދަށަށް ގެންގޮސްފައި ވަނިކޮށެވެ.
ފުލުހުންގެ ދެކުނު ކޮމާންޑަރު ޗީފް އިންސްޕެކްޓަރު އަހުމަދު ޝިފާން ވިދާޅުވީ ހިތަދޫގެ ބައެއް ތަންތަން ޗެކް ކުރަމުން ދަނީ ފުލުހުން ކުރިއަށް ގެންދާ ބޮޑު އޮޕަރޭޝަނެއްގެ ދަށުން ކަމަށެވެ. އަދި އެތަން ތަން ފާސްކޮށްފައި ވަނީ ކޯޓު އަމުރެއްގެ ދަށުން ކަމަށް ފުލުހުން ބުނެ އެވެ.
ފުލުހުން މިއަދު ހިންގި ހާއްސަ އޮޕަރޭޝަނުގައި ފާސްކޮށްފައިވާ ދެ ގެއަކީ ބަރަހަނާ ވީޑިއޯތަކެއްގެ މައްސަލައެއްގައި މީގެ ކުރިން ވެސް ފާސްކޮށްފައިވާ ދެ ގެ އެވެ.
ޝިފާން ވިދާޅުވީ މިއަދު ކުރިއަށް ގެންދިޔަ ޗެކް ކުރުމުގެ ތެރެއިން ހާޑް ޑިސްކާއި އެފަދަ އެހެން ބައެެއް ތަކެތި ފުލުުހުން ބަލަމުންދާ މައްސަލައަކާ ގުޅޭ ގޮތުން ހޯދާފައިވާ ކަމަށެވެ.
އެކަމަކު ފުލުހުން ގެންދިޔަ ހާޑްތަކުގައި ފުއާދުގެ އަދި އެ ނޫން ވެސް ސަރުކާރުގެ އިސް ވެރިއެއްގެ ބަރަހަނާ ވީޑިއޯތަކެއް ހުރިތޯ ސުވާލް ކުރުމުން ޝިފާން ވިދާޅުވީ އެކަމަށް "އާއެކޭ ނުވަތަ ނޫނެކޭ ވެސް މި ވަގުތު ބުނެވެން ނެތް" ކަމަށެވެ.