އިންޑިއާގެ ޓުޓިކޮރިން އިން އައްޑޫއަށް ފަށާ ކާގޯ ދަތުރުތަކުގެ ފުރަތަމަ ބޯޓު އަންނަ ޑިސެމްބަރު މަހު ފުރަތަމަ ހަފްތާ ތެރޭގައި ހިތަދޫ ސަރަހައްދީ ބަނދަރަށް އަންނާނެ ކަމަށް މޯލްޑިވްސް ސްޓޭޓު ޝިޕިން ލިމިޓެޑުން ބުނެފިއެވެ.
މޯލްޑިވްސް ސްޓޭޓް ޝިޕިން (އެމްއެސްއެސް) މެނޭޖިން ޑިރެކްޓަރ ކެޕްޓަން އަބްދުﷲ ސައިދު މިއަދު "އައްޑޫލައިވް" އަށް ވިދާޅުވީ އައްޑޫ އާއި ތިނަދޫ އަދި އިންޑިއާގެ ޓުޓިކޮރިން އާއި ދެމެދު ސީދާ ދަތުރުތަށް ފެށުމަށް ފުރަތަމަ ކާގޯ ބޯޓު މާލެއިން މިއަދު ޓުޓިކޮރިން ދިއުމަށް ފުރާފައިވާ ކަމަށެވެ.
"އަޅުގަނޑުމެންގެ ބޯޓު މިއަދު މި ފުރީ މާލެއިން ޓުޓިކޮރިން އަށް ދިއުމަށް، މި ބަލަނީ ބޯޓު މިމަހުގެ 27 ވަނަ ދުވަހު ޓުޓިކޮރިން ބަނދަރަށް ދެވޭނެ ކަމަށް އަދި ލޯޑުކޮށްގެން ޑިސެމްބަރު 6 ވަނަ ދުވަހު އައްޑޫއަށް އާދެވޭނެކަމަށް"
ސައީދު ވިދާޅުވީ އިންޑިއާގެ ޓުޓިކޮރިން އިން އައްޑޫއަށް މުދާ ގެނައުމަށް މަސައްކަތް ކުރަމުން އަންނަ އިރު މިއީ އައްޑޫގެ ވިޔަފާރިވެރިންނަށް އަގުހެޔޮކޮށް އިންޑިއާއިން މުދާ ގެނައުމަށް ހުޅުވިގެންދާ ދޮރެއް ކަމަށެވެ. އަދި މިހާރު މުދާ ގެނައުމަށް ބުކިން ހެދުމަށް ހުޅުވާލާފައިވާ ކަމަށެވެ.
"އަޅުގަނޑުމެން މި ބަލަނީ ކުރިއަށް ދެ ދުވަހެއްގެ ތެރޭގައި އައްޑޫގެ ވިޔަފާރިވެރިން މުދާ ގެނައުމުގެ މަސައްކަތް ފަށާނެކަމަށް، އަދި އަޅުގަނޑުމެން މި ހުޅުވާލާ ފުރުސަތުގައި ތާޒާ ކަމާއި އެކު ޕެރިޝަބްލް އަދި އައިސް ކުރި މުދާ އައްޑޫއަށް ގެނެވޭނެ"
ސައީދު ވިދާޅުވިއެވެ.
ސައީދު ވިދާޅުވީ ޝެޑުއުލްއެއްގެ ތެރެއިން ދަތުރު ފެށުމުން ވިޔަފާރިވެރިންނަށް މުދާ ގަނައުމަށް ބޮޑުތަން ފަސޭހަ ވެގެންދާނެކަމަށެވެ. އަދި އެއާއި އެކު މުދަލުގެ އަގުތައް ކުޑަވެގެންދާނެ ކަމަށް ސައީދު ވިދާޅުވިއެވެ.
ޓުޓިކޮރިން އިން އައްޑޫއަށް މުދާ ގެނައުމުގެ އަގުވެސް މިހާރު އެމްއެސްއެސް އިން ވަނީ އާއްމުކޮށްފައެވެ. އެގޮތުން ޖެނެރަލް ކާގޯ ޓަނެއްގެ އައްޑޫއަށް ގެނެވޭ އަގަކީ ޓަނެއް 35 ޑޮލަރަށެވެ. އަދި އެލްސީއެލް ކާގޯ 39 ޑޮލަރަށް ގެނެވޭއިރު ރެފްރިޖަރޭޓެޑް ކާގޭ ޓަނެއްގެ އަގަކީ 69 ޑޮލަރުކަމަށް ސައީދު ވިދާޅުވިއެވެ.
"އަޅުގަޑުމެން މި ބަލަނީ ކޮންމެ 20 ދުވަހަކުން ދަތުރެއް ކުރެވޭތޯ، މިކަމާއި ހިތަދޫ ޕޯޓްސް ލިމިޓެޑާއި އެކުވެސް މިއަންނަނީ މަޝްވަރާ ކުރަމުން"
ސައީދު ވިދާޅުވިއެވެ.
ކާގޯ ފެރީ އާއި ގުޅިގެން ހިތަދޫ ޕޯޓް ލިމިޓެޑް (އެޗްޕީއެލް) އިން ބުނީ މިއީ ދެކުނުގެ ރައްޔިތުންނަށް އަތްފޯރާ އަގުގައި މުދާ ލިބިގެން ދާނެ ކަމެއް ކަމަށެވެ. އަދި މިއީ ހިތަދޫ ޕޯޓަށާއި ދެކުނުގެ ވިޔަފާރިތަކަށް ލިބޭ ކުރިއެރުމެއް ކަމަށްވެސް އެޗްޕީއެލް އިން ބުނެއެވެ.
އައްޑޫ އަދި ހުވަދޫއަށް ޓިޓިކޮރިންއިން ސީދާ ކާގޯ ގެނައުމަށް މަސައްކަތް ކުރަމުން އަންނަ ކަން އިއްލާންޮށްފައިވަނީ ހއ. ހޯރަފުށީ އެއާޕޯޓު ހުޅުވައިދިނުމުގެ ރަސްމިއްޔާތުގައި ރައީސް އިބްރާހިމް މުހައްމަދު ސޯލިހުއެވެ.
ވިޔަފާރި ލާމަރުކަޒީކޮށް ރާއްޖޭގެ އެކި ކަންކޮޅުތަކަށް އަގުހެޔޮކޮށް ރާއްޖެއިން ބޭރުން ސީދާ މުދާ ގެނެސް އަތޮޅުތައް ތަރައްޤީ ކުރުމުގެ ސިޔާސަތުގެ ދަށުން ހދ. ކުޅުދުއްފުއްޓާއި އިންޑިޔާގެ ކޮޗިންއާ ދެމެދު މިދިޔަ ސެޕްޓެމްބަރު މަހު ވަނީ ކާގޯ ފެރީގެ ހިދުމަތް ފަށާފައެވެ. ކާގޯ ބޯޓުގެ ފުރަތަމަ ދަތުރުގައި ސެޕްޓެމްބަރު މަހުގެ 26 ވަނަ ދުވަހު ވަނީ ހދ.ކުޅުދުއްފުއްޓަށް އައިސްފައެވެ. ކުޅުދުއްފުއްޓަށް ފަހު މިދިޔަ ސެޕްޓެމްބަރު މަހުގެ 28 ވަނަ ދުވަހު އެ ބޯޓު ވަނީ މާލެ އަށް ބަނދަރުކޮށްފައެވެ.