އައްޑޫ ހައި ސްކޫލް ކައިރީ ހުންނަ ގަރާޖެއްގެ ކުރިމަތީ ބާއްވާފައި އޮތް ޕިކަޕެއްގައި ރޯވެ، އެ ޕިކަޕަށް ބޮޑެތި ގެއްލުންތަކެއް ވެއްޖެއެވެ.
ފުލުހުން ބުނީ ސ. ހިތަދޫ "ކާ ސާވް އޮޓޯ ރިޕެއާ ސާވިސް ގަރާޖު" ކުރިމަތީ އޮތް ޕިކަޕެއްގައި ރޯވި ކަމުގެ މައުލޫމާތު ފުލުހުންނަށް ލިބިފައިވަނީ ރޭ 12:56 ހާއިރު ކަމަށެވެ. މި ހާދިސާގައި ޕިކަޕްގައި ރޯވި އަލިފާންގަނޑު ނިއްވާލާފައިވަނީ އެސަރަައްދަށް ދިޔަ އާއްމުންގެ މަސައްކަތުން ކަމަށް ފުލުހުން ބުނެއެވެ.
މިހާދިސާގައި އެއްވެސް މީހަކަށް އަނިޔާވެފައި ނުވެއެވެ. ނަމަވެސް ޕިކަޕްގެ ކުރީކޮޅު ވަރަށް ބޮޑަށް އަނދައިގެން ގޮސްފައިވާކަމަށް ފުލުހުން ބުނެއެވެ.
މިއީ ބަޔަކު ގަސްތުގައި ހިންގި އަމަލެއް ކަމަށް އަދި އެއްވެސް ފަރާތަކުން ބުނެފައިނުވެއެވެ. އަދި ފުލުހުން އަންނަނީ މިމައްސަލަ ތަހުގީގު ކުރަމުންނެވެ.