ރައްޔިތުންގެ މަޖިލީހުގެ މިއަދުގެ ޖަލްސާ ފެށުމާއި އެކު އަޑުގަދަ ކުރަން ފެށުމުން މަރަދޫ ދާއިރާގެ މެމްބަރު އިބްރާހިމް ޝަރީފުގެ ނަން އިއްވައި މަޖްލިސްގެ ތަޅުމުން ބޭރުކޮށްފިއެވެ.
ރައްޔިތުންގެ މަޖިލީހުގެ ރައީސް މުހައްމަދު ނަޝީދު ޝަރީފުގެ ނަން އިއްވައި މަޖްލިސް ތަޅުމުން ބޭރު ކުރީ ވަރަށް ބޮޑަށް ކޯފާ އިސްކުރައްވައި ހުންނަވައެވެ.
"ސާޖަންޓް އެޓް އާމްސް، މީނާ ނެރޭ. ސާޖަންޓް އެޓް އާމްސް، ސާޖަންޓް އެޓް އާމްސް މީނާ ނެރޭ،" ނަޝީދު ވިދާޅުވިއެވެ.
މިއަދުގެ ޖަލްސާ ފެށުނު އިރު ޝަރީފު ހުންނެވީ ބިލެއްދޫ ދާއިރާގެ މެމްބަރު އަހުމަދު ހަލީމް (ދޮންބިލެތް) އާއި ދެމެދު ޒުވާބު ކުރާށެވެ. އެގޮތުން ދޮންބިލެތް ހުންނަވާ ގޮޑި ކާރިއަށް ގޮސް ޝަރީފު އަޑުގަދަ ކުރަން ފެށުމުން މަޖްލިސްގެ ރިޔާސަތުން އެކަން ހުއްޓާލުމަށް އެދުމުން ޝަރީފު ވަނީ އިޖާބަ ނުދީފައެވެ.
މަޖްލިސްގެ ރައީސް ނަޝީދު ވިދާޅުވީ ޝަރީފު ބޭރު ކުރަން ޖެހުނީ ދެ މެމްބަރުންގެ ދެމެދުގައި ހިޔާލު ތަފާތުވެ ޒުވާބު ކުރަން ފެށުމުން ކަމަށެވެ.