މަޤާމުގެ ނުފޫޒު ބޭނުންކޮށްގެން ނަޖާއިޒު ހޯދުމާއި ހޯދައިދިނުމުގެ ދައުވާ އުފުލިއަސް ޖެހިލުމެއް ނުވާ ކަމަށާއި އަމަލުކޮށްފައިވާނީ ރަނގަޅަށް ކަމަށް ހިތަދޫ ޕޯޓްސް ލިމިޓެޑްގެ ކުރީގެ އެސިސްޓެންޓު މެނޭޖަރ މުހައްމަދު ރަޝީދު (މެޓްރިކްސް މޯޑު) ވިދާޅުވެއްޖެއެވެ.
ނިމިދިޔަ ރިޔާސީ އިންތިޚާބު ދުވަސްވަރު ހިތަދޫ ޕޯޓްސް ލިމިޓެޑްގެ މުވައްޒަފުން ތަކެއް އުސޫލުން ބޭރުން ރިލީޒު ކުރިކަމަށް ބުނެ އޭސީސީން ވަނީ މޯޑުގެ މައްސަލަ ތަހްގީގުކޮށް ދައުވާ ކުރުމަށް ޕީޖީ އޮފީހަށް ފޮނުވާފައެވެ.
އޭސީސީން ބުނީ މި މައްސަލައަކީ، ހިތަދޫ ޕޯޓްސް ލިމިޓެޑްގެ މުވައްޒަފުންތަކަކަށް، އޮފީހަށް ހާޒިރުވާން ނުޖެހޭގޮތަށް އަދި ޗުއްޓީއެއް ނެގުމަކާނުލައި ކުރީގެ ރައީސް ޢަބްދުﷲ ޔާމީން ޢަބްދުލްޤައްޔޫމުގެ ކެމްޕެއިނަށް ވަޒީފާއިން ވީއްލައި، އެ ދުވަސްތަކަށް މުވައްޒަފުންނަށް މުސާރަ ދީފައިވާކަމަށާއި، އެކަން ކޮށްފައިވަނީ އެކުންފުނީގެ އެސިސްޓެންޓް މެނޭޖިންގ ޑިރެކްޓަރ ގެ މަޤާމުގައި ހުރި މުޙައްމަދު ރަޝީދުގެ މަޤާމުގެ ނުފޫޒު ބޭނުންކޮށް، އޭނާގެ އެންގުމަށް ކަމަށް ބުނެ ކޮމިޝަނަށް ހުށަހެޅި މައްސަލައެއް ތަހުގީގު ކުރުމަށްފަހު ކަމަށެވެ.
މި މައްސަލައިގެ ތަޙްޤީޤަށް އޭސީސީ އަށް ފާހަގަކުރެވުނު ކަންތައްތަކަށް ބަލާއިރު، 19 ޖޫން 2018 ގައި ހިތަދޫ ޕޯޓްސް ލިމިޓެޑްގެ އެސިސްޓެންޓް މެނޭޖިންގ ޑިރެކްޓަރ މުޙައްމަދު ރަޝީދު އެ ކުންފުނީގެ އެސިސްޓެންޓް އެޗް.އާރް މެނޭޖަރ އަށް ފޮނުވާފައިވާ މެމޯގައި، 21 ޖޫން 2018 އިން ފެށިގެން، އެ ކުންފުނީގައި މަސައްކަތްކުރާ 16 މުވައްޒަފަކު އެ ކުންފުނީގެ ބޭނުމަކަށް ކަމަށް ބުނެ، މަސައްކަތުގެ ޒިންމާއިން ވީއްލައިދިނުމަށް އެދިފައިވާކަން އެނގޭ ކަމަށް އެ ކޮމިޝަނުން ބުނެއެވެ.
އަދި 2018 ވަނަ އަހަރުގެ ޖުލައި މަހާއި ސެޕްޓެންބަރު މަހާ ދެމެދު 12 މުވައްޒަފަކު ރިލީޒްގައި ތިބިއިރު، މި މުވައްޒަފުން އޮފީހަށް ޙާޟިރުނުވާ ދުވަސްތަކަށްވެސް މުސާރައާއި އެލަވަންސް ދީފައިވާ ކަމަށްވެސް އޭސީސީން ބުނެއެވެ.
މީގެއިތުރުން 2018 ވަނަ އަހަރުގެ ރިޔާސީ އިންތިޚާބު ދުވަސްވަރު ހިތަދޫ ޕޯޓްސް ލިމިޓެޑްގެ މުވައްޒަފުންނަށް ދީފައިވާ ރިލީޒްއަކީ، ރިލީޒްދިނުމުގައި ޢަމަލުކުރަމުންދާގޮތާ ޚިލާފަށް ދީފައިވާ ރިލީޒްއެއްކަން މި މައްސަލައިގެ ތަޙްޤީޤަށް ފާހަގަކުރެވިފައިވާ ކަމަށް އޭސީސީން ބުނެއެވެ.
އެގޮތުން، އެ ދުވަސްވަރު ރިލީޒްދީފައިވާ މުވައްޒަފުން އޮފީހަށް ޙާޟިރުނުވި ނަމަވެސް، އެފަރާތްތަކުން އޮފީހަށް ޙާޟިރުވިކަމަށް ދެއްކުމަށްޓަކައި، ހިތަދޫ ޕޯޓްސް ލިމިޓެޑްގެ އެޓެންޑެންސް ސިސްޓަމަށް ބަދަލުގެނައުމަށް، ހިތަދޫ ޕޯޓްސް ލިމިޓެޑްގެ އެސިސްޓެންޓް މެނޭޖިންގ ޑިރެކްޓަރ މުޙައްމަދު ރަޝީދު، އެ ކުންފުނީގެ އައި.ޓީ މުވައްޒަފުންނަށް އަންގާފައިވާކަން، ތަހުގީގަށް ފާހަގަކުރެވިފައިވާ ކަމަށްވެސް އޭސީސީން ބުނެއެވެ.
މޯޑު މިއަދު ވިދާޅުވީ ދައުވާ އާއި ކުރިމަތިލާނެ ކަމަށާއި އަމަލުކޮށްފައިވަނީ ރަނގަޅަށް ކަމަށެވެ.
މޯޑުގެ މައްޗަށް އޭސީސީން ދައުވާ އުފުލާފައިވާ އިރު 2012 ފެބްރުއަރީ 8 ވަނަ ދުވަހު އައްޑޫގެ ކޯޓުތަކާއި ޕޮލިސް ސްޓޭޝަންގައި ހުޅުޖެހި މައްސަލަ އާއި ގުޅިގެން މޯޑުގެ މައްޗަށް ދައުވާ އުފުލައި ޝަރީއަތްތައް ވަނީ ބާއްވާފައެވެ. އެ މައްްސަލަ އާއި ގުޅިގެން އަދި މިހާތަނަށް މޯޑުގެ މައްޗަށް ހުކުމެއް އިއްވާފައި ނުވެއެވެ.
މޯޑު ފަހުން ވަނީ އެމްޑީޕީން ވަކިވެ ޕީޕީއެމް އާއި ގުޅުމަށް ފަހު ރައީސް ޔާމީން ޕްރޮމޯޓު ކުރުމަށް އައްޑޫގައި އިސް ދައުރެއް އަދާކޮށްފައެވެ. މޯޑު އަކީ މިހާރު ޕީޕީއެމް ހިތަދޫ ސްޓިއަރިން ކޮމެޓީގެ ރައީސްްއެވެ.