ގއ. ދާންދޫގައި މިރޭ އިރާކޮޅު ހިނގި އެކްސިޑެންޓެއްގައި ތިން އަހަރުގެ ކުއްޖަކަށް ސީރިއަސް އަނިޔާތަކެއް ވެއްޖެއެވެ.
މައުލޫމާތު ލިބިފައިވާ ގޮތުގައި އެކްސިޑެންޓު ހިނގާފައިވަނީ ބާރު ސްޕީޑުގައި ދުއްވާފައި ދިޔަ ސައިކަލަކުން މަގުމަތީގައި ހުރި ކުއްޖެއްގެ ގައިގައި ޖެހިގެންނެވެ. މި ހާދިސާގައި ކުއްޖާ ވިއްސައިގެން ގޮސް ބިންމަތީ ޖެހި އެކުއްޖާގެ ބޮލަށް ވަނީ ސީރިއަސް އަނިޔާތެއް ލިބިފައެވެ.
އެކުއްޖާއަށް ލިބިފައިވާ އަނިޔާއަށް ފަރުވާ ދިނުމަށް ގއ. ވިލިނގިލީ ހޮސްޕިޓަލަށް ގެންގޮސްފައިވާ އިރު އިތުރު ތަފްސީލެއް އަދި ނުލިބެއެވެ.
މި ހާދިސާގައި ސައިކަލް ދުއްވާފައިވަނީ ޏ. ފުވައްމުލަކަށް ނިސްބަތްވާ 19 އަހަރުގެ ޒުވާނެކެވެ. އެޒުވާނާއަކީ ޗުއްޓީއަށް އެރަށް ގޮސް އުޅުނު ޒުވާނެއް ކަމަށް މައުލޫމާތު ލިބެއެވެ.
ފުލުހުން ބުނީ ދާންދޫގައި ދުއްވާފައި ދިޔަ ސައިކަލެއް ތިން އަހަރުގެ އަންހެން ކުއްޖެއްގެ ގައިގަ ޖެހި މިއަދު 18:10 ކަންހާއިރު އެކްސިޑެންޓެއް ހިނގި މައްސަލައެއް ފުލުހުންނަށް ހުށަހަޅާފައިވާ ކަމަށެވެ. މިހާދިސާގައި ސައިކަލް ދުއްވި ޒުވާނާގެ އަތުގައި ލައިސަންސް ނެތް ކަމަށް ފުލުހުން ބުނެއެވެ.
މި މައްސަލަ ފުލުހުން ދަނީ އިތުރަށް ތަހްގީގު ކުރަމުންނެވެ.