އިންޑިއާ ސަރުކާރުގެ ހިލޭ އެހިގެ ދަށުން އައްޑޫގައި އިމާރާތް ކުރަމުން އަންނަ ޕޮލިސް އެކަޑަމީ ހިންގާނީ ދިވެހި ސަރުކާރުގެ ބެލުމުގެ ދަށުން ދިވެހި ފުލުހުންކަމަށް ކަމިޝްނާ އޮފް ޕޮލިސް މުހައްމަދު ހަމީދު ވިދާޅުވެއްޖެއެވެ.
ޕޮލިސް އެކަޑަމީގެ މަސައްކަތް ކުރިއަށްދާ ގޮތް ބައްލަވާލެއްވުމަށް ސީޕީ ހަމީދު އާއި ފުލުހުންގެ އިސް ބޭފުޅުން އައްޑޫއަށް ވަޑައިގެން މީޑިއާ އާއި ވާހަކަފުޅު ދައްކަވަމުން ހަމީދު ވިދާޅުވީ ޕޮލިސް އެކަޑަމީ އަކީ ލޯ އެންފޯސްމަންޓު އިންސްޓިޓިއުޓެއް ކަމަށާއި އެތަން އިންޑިއާގެ މިލިިޓަރީ ބޭސްއަކަށް ސިފަ ނުކުރެވޭކަމަށެވެ.
"ތިބޭފުޅުންނަށް މި ދެއްކީ މިތަނުގެ އެތެރެ، މިތަނަށް ބަލާލީމަ ވެސް އެނގޭނެ މިލިޓަރީ ތަނެއް ނޫންކަން މިއީ. މިތަން ވާނީ ދިވެހި ފުލުހުން އޯންކުރާ ފެސިލިޓީއަކަށް. މިތަނުގެ ބެލެނިވެރިކަން ސަރުކާރުން އޮތީ ދިވެހި ފުލުހުންނާ ހަވާލުކޮށްފައި. މިތަން ބޭނުންކުރެވިގެން ދާނީ ފުލުހުންނާއި ރާއްޖޭގެ އެހެން އެންފޯސްމަންޓް އިދާރާތަކުގެ ޓްރޭނިންތަކަށް ބޭނުން ހިފާނެ ތަނަކަށް،" ހަމީދު ވިދާޅުވިއެވެ.
ހަމީދު ވިދާޅުވީ "އިންސްޓިޓިއުޓް އޮފް ސެކިއުރިޓީ އެންޑް ލޯ އެންފޯސްމަންޓް ސްޓަޑީޒް" ގެ ނަން މިހާރު އެތަނަށްކީ ނަމަވެސް އެއީ މިހާރު އެއީ "ނެޝަނަލް ކޮލެޖް އޮފް ޕޮލިސިން އެންޑް ލޯ އެންފޯސްމަންޓް" އެވެ.
ހަމީދު ވިދާޅުވީ މިތަނުގެ ބޭނުން ދިވެހި ފުލުހުންގެ އިތުރުން ދައުލަތުގެ ބައެއް އިދާރާތަކަށާއި، ސްކޫލް ތަކުގެ އިތުރުން ޖަމިއްމާ ޖަމާއަތްތަކަށް ބޭނުން ކުރެވޭނެ ކަމަށެވެ.
އިންޑިއާ ސަރުކާރުގެ އެީގެ ދަށުން ހަދާ މި އެކަޑަމީއަށް 42 މިލިއަން ޑޮލަރު ހަރަދުކޮށްފައިވާ އިރު މިތަން އަންނަ މާޗު މަހު ނިމިގެންދާނެ ކަމަށް ސީޕީ ހަމީދު ވިދާޅުވިއެވެ.