މާލެ ކުނި ނަގާ ގަޑި ރޭގަނޑަށް ބަދަލު ކުރުމަށް ނިންމައި ވޭސްޓް މެނޭޖްމަންޓު ކޯޕަރޭޝަން (ވެމްކޯ)އިން އެކަން އިއްލާން ކޮށްފިއެވެ.
ވެމްކޯއިން މިއަދު ބޭއްވި ނޫސްވެރިންގެ ބައްދަލުވުމެއްގައި ކުންފުނީގެ މެނޭޖިން ޑިރެކްޓަރު އާދަމް މުހައްމަދު ވިދާޅުވީ އަންނަ މަހުގެ 15 އިން ފެށިގެން ކުނި ނަގަން ފަށާނީ ރޭގަނޑު 12:00 އިން ފެށިގެން ކަމަށެވެ. އަދި ކޮންމެ ރެއެއްގެ 10 ޖެހުމުގެ ކުރިން ކުނި ކޮތަޅު ބޭރުކޮށްދިނުމަށް އާދަމު އެދިވަޑައިގެންނެވިއެވެ.
"އަޅުގަނޑުމެން ކުނި ނަގަން ފަށާނީ 12 ޖަހާއިރު، އެހެންވެ އިރާދުކުރެއްވިއްޔާ ފަތިސް ނަމާދަށް މީހުން ނުކުންނަށް ވާއިރަށް މަގުތައް އޮންނާނީ ސާފުކޮށް. ރީތިކޮށް. މި ގަޑީގައި މަގުތަކުގައި ކުނި ކެހުން ވެސް ކުރިއަށް ދާނެ،" އާދަމް ވިދާޅުވިއެވެ.
އާދަމް ވިދާޅުވީ ރޭގަނޑަށް ކުނި ނަގަން ބަދަލު ކުރުމުން ކުންފުނީގެ މުވައްްޒަފުންނަށް ދަތިތަކެއް ކުރިމަތިވާނެކަމަށެވެ. ނަމަވެސް އެކުންފުނިން ބަލަނީ ރައްޔިތުންނަށް ރަނގަޅު ހިދްމަތެއް ދިނުމަށް ކަމަށް އާދަމް ވިދާޅުވިއެވެ.
ވެމްކޯއިން ކުނި ނަގާ ގަޑިއަށް ބަދަލު ގެނައި އިރު އެކުންފުނިން މިހާރު ކުނި ނަގަން ފަށަނީ މެންދުރު 2 އިންނެވެ.