މިދިޔަ އަހަރު "ސުވާދީބް" ގެ ނަމުގައި ފޮތެއް ނެރުއްވި އަލީ ފަހުމީ އަހުމަދުގެ ދެވަނަ ފޮތް "އައްޑޫ ގަން ހިންގުން" ރޭ ނެރެފި އެވެ.
ރޭ މާލެ ސިޓީ ހޯލްގައި ބޭއްވި ރަސްމިއްޔާތެއްގައި މި ފޮތް ނެރެދެއްވީ އެމްޑީޕީގެ ރިޔާސީ ކެންޑިޑޭޓް އަދި ކުރީގެ ރައީސް މުހައްމަދު ނަޝީދެވެ.
މި ފޮތް ނެރެދެއްވުމަށް ފަހު ނަޝީދު ވަނީ އައްޑު އާއި ގަމުގެ ތަރައްގީ އާ ބެހޭ ގޮތުން ވެސް ވާހަކަ ދައްކައިފަ އެވެ.
އެ މަނިކުފާން ވިދާޅުވީ އިނގިރޭސީން ގަން ދޫކޮށްފައި ދިއުމާ އެކު "އަޅުގަނޑުމެން ކުޑަ އިރު ފެނުނީ ގަން ނޮޅާލައިގެން މާލެ ގެންދިޔަ ތަން" ކަމަށެވެ.
އަދި އައްޑޫ ތަރައްގީވެގެން ދިއުމަކީ މާލޭގެ ސަރުކާރަށް ބިރަކަށް ވެދާނެތީ އެކަމާ ސަރުކާރުން އުޅުއްވި ކަމަށް ވިދާޅުވި އެވެ.
ނަޝީދު ވިދާޅުވީ ގަމުން މާލެ އަށް އެ ދުވަސްވަރު ދުވަހަކު ނުދެކޭ ކަހަލަ ވަރަށް ގިނަ ތަކެތި ގެނެސްފައިވާ ކަމަށެވެ.
ސ. ފޭދޫ ޕްލަޓް ފަހުމީ (އަހަންމާގަ ފަހުމީ) ލިޔުއްވި "އައްޑޫ ގަން ހިންގުން" ފޮތުގައި މައިގަނޑު ގޮތެއްގައި އަލިއަޅުވާލައިފައި ވަނީ ކުރީގެ ރައީސް މައުމޫން އަބްދުލް ގައްޔޫމްގެ ވެރިކަން ފެށިގެން އައުމާ އެކު އައްޑޫގެ ތަރައްގީއަށާއި ކުރިއެރުމަށް ރައްޔިތުން ކުރި އުންމީދުތަކާއި މައުމޫންގެ ވެރިކަމުގައި އައްޑޫގެ ބޮޑު އެސެޓެއްގެ ގޮތުގައި އޮތް ގަމާ ގުޅޭ ގޮތުން ގެންގުޅުއްވާފައިވާ އެކިއެކި ސިޔާސަތުތަކުގެ ވާހަކަ އެވެ.
މީގެ އިތުރުން މި ފޮތުގައި މައުމޫނުގެ ވެރިކަމުގެ ފަހުގެ ދުވަސްތަކާއި، ރާއްޖޭގައި ތިން އަހަރު ވެރިކަން ކުރެއްވި ނަޝީދުގެ ސިޔާސީ މަސައްކަތްތައް ފެށިގެން އައި ގޮތާއި އެކަމުގައި ކުރިމަތިވި ގޮންޖެހުންތަކާ ބެހޭ ގޮތުން ލިޔެފައިވެ އެވެ.