އައްޑޫ ހިމާޔަތް ކުރާނީ އައްޑޫގެ ރައްޔިތުންނެވެ.

ނޯޓް: މިއީ އައްޑޫ ޑެޕިއުޓީ މޭޔަރު އަދި ހުޅުމީދޫ ދާއިރާގެ ކައުންސިލަރު ހަސަން ޝާހިދު އޭނާގެ ބްލޮގް "ވެލްކަމް ޓް ޝާހިދު ލައިވް" ގައި ސެޕްޓެމްބަރު 27، 2013 ގައި ލިޔެފައިވާ އާޓިކަލެކެވެ. ކިއުންތެރިން އިންސާފުކޮށްލައްވާށެވެ.
——————————————————–

ފެބުރުއަރީ 7، 2012 ވަނަ ދުވަހު ދިވެހި ރާއްޖޭގެ އިންތިޚާބީ ވެރިކަން ބަޣާވާތަކުން ވައްޓާލުމަށް ފަހު، އެ ބަޣާވާތުގެ ތެރޭގައި ދިވެހި ރައްޔިތުންނަށް ދިން ލާއިންސާނީ އަނިޔާތައް ފޮރުވުމަށްޓަކައި، ފެބްރުއަރީ 8 ވަނަ ދުވަހު އައްޑޫ ސިޓީ އަށް ބާޣީން ދިން ހަމަލާތަކުގެ ތުހުމަތު މި ސިޓީގެ ކުށެއްނެތް އެތަކެއް ރައްޔިތުންގެ ބޮލުގައި އަޅުވައި، ބަޣާވާތާ ދެކޮޅަށް ޝުއޫރުފާޅު ކުރި ރައްޔިތުން ހިފާ ހައްޔަރުކޮށް ހިންގި ލާއިންސާނީ އަނިޔާތަކުގެ ހަނދާންތައް އައްޑޫ ރައްޔިތުންގެ ހިތްތަކުގައި މި އަދު ވެސް ވަނީ ބިންވަޅު ނެގިފަ އެވެ.

ބަޣާވާތަށް ފަހު ދިވެހި ރާއްޖޭގެ ރައްޔިތުން އުޅެން ޖެހުނު ހިތްދަތިކަމުން އަރައިގަތުމަށްޓަކައި، ރައްޔިތުން އިޚްތިޔާރު ކުރީ ގާނޫނު އަސާސީން ރައްޔިތުންނަށް ލިބި ދީފައިވާ ވޯޓް ލުމުގެ ހައްޤު ބޭނުން ކުރާށެވެ.

އެގޮތުން، 7 ސެޕްޓެމްބަރު 2013 ވަނަ ދުވަހު ބޭއްވި ރިޔާސީ އިންތިޚާބުގައި ރައްޔިތުން ވަނީ ބާޣީންނަށް ވަރަށް ސާފު ބަހުން ނޫނެކޭ ބުނެފަ އެވެ.
ނަމަވެސް ރައްޔިތުންގެ މި ނިންމުމަށް ބާޣީން އަނެއްކާ ވެސް މި ވަނީ ހުރަސް އަޅާފަ އެވެ. ބާޣީންގެ މި އަމަލު ފޮރުވުމަށްޓަކައި، ފެބްރުއަރީ 8 ވަނަ ދުވަހު ހިންގި ފަދަ ޖަރީމާތައް ރާއްޖޭގެ އެކި ކަންކޮޅުތަކުގައި ހިންގަން ފަށާފައިވާ މި ނުރައްކާތެރި ދަނޑިވަޅުގައި، އައްޑޫގެ އެއްމެހާ ރައްޔިތުން ސިޔާސީ ފިކުރުން އެއްކިބާވެ، ކެއްތެރިކަމާއެކު އައްޑޫގެ ހިމާޔަތުގައި ހޭލާ ތިބުމަކީ ނުހަނު ބޭނުންތެރި ކަމެކެވެ.

ދިވެހި ރާއްޖޭގެ ސިޔާސީ މަސްރަހުގައި ހިނގާ ކޮންމެ ހަމަނުޖެހުމެއްގައި، އައްޑޫ ފުނޑާލުމަށްޓަކައި، އައްޑޫ ރައްޔިތުންނާ ހަސަދަވެރިވާ ބަޔަކު އުޅޭކަން މާޒީގެ ސަފުހާތަކުން ވަނީ ފެނިފަ އެވެ. މި ދެންނެވި ހަސަދަވެރިކަން އަބަދުވެސް ފެށިގެން އަންނަނީ، އެއިރަކު އޮންނަ ސަރުކާރެއްގެ ތެރެއިންކަން މި ފުރުސަތުގައި ހަނދާން ކުރަން ޖެހެ އެވެ.

ވީމާ، ބަޣާވާތުގެ ސަރުކާރާ ދެކޮޅު ހެދުމުގެ ގޮތުން ވިޔަސް، ނުވަތަ އެ ސަރުކާރަށް ތާއީދު ކުރުމުގެ ގޮތުން ވިޔަސް އަޅުގަނޑުމެންގެ މި ފަޚްރުވެރި އައްޑު އަށް ކުޑަ ނަމަވެސް ގެއްލުމެއް ލިބިދާނެ ކަމެއްގައި އެއްވެސް ރައްޔިތަކު ބައިވެރި ނުވެ، މިފަދަ ނުރައްކާތެރި ދަނޑިވަޅުތަކުގައި އަޅުގަނޑުމެންގެ ކާބަފައިން ދައްކާފައިވާ އެކުވެރިކަމާއި، އެއްބައިވަންތަކަން ހަނދާންކޮށް، ގަދަ ހިތްވަރާ އެކު ވަރުގަދަ އަޒުމެއްގައި އައްޑޫ ހިމާޔަތްކުރަން އަތާއި އަތް ގުޅުވާލަމާ ހިނގާށެވެ.

ހަގީގީ މިނިވަން ކަމެއް އޮތީ ހަސަދަވެރިންގެ އަނިޔާވެރިކަމުން ސަލާމަތްވެފައިވާ އައްޑޫ ހޯދިގެންނެވެ.