ސުޕްރީމް ކޯޓުގެ ކުރީގެ ފަނޑިޔާރު މުޖްތާޒު ފަހުމީ ކޮވިޑަށް ޕޮޒިޓިވްވެ ފަރުވާ ދެމުން ދަނިކޮށް ރޭ ދަންވަރު އަވަހާރަވެއްޖެއެވެ.
މުޖްތާޒު ކޮވިޑަށް ޕޮޒިޓިވްވި ކަން އެނގުނީ އާއިލާ އާއި އެކު ލ. އަތޮޅަށް ވަޑައިގެން ލ. ކުޑަފުށީގައި ކަރަންޓީނުގައި ހުންނަވަނިކޮށް ރޯގާގެ އަލާމާތް ފެނިގެން ޓެސްޓު ކުރެއްވުމުންނެވެ. ލ. ކޮވިޑު ފެސިލިޓީން މުޖްތާޒަށް ފަރުވާ ދެއްވަމުން ދަނިކޮށް ސިއްހީހާލުކޮޅު ދެރަވެގެން އިއްޔެގެ ވަގުތެއްގައި ވަނީ މާލެ ގެނެސް ދަރުމަވަންތަ ހޮސްޕިޓަލްގައި ފަރުވާ ދޭން ފަށާފައެވެ.
މުޖްތާޒު އަވަހާރަވެފައިވަނީ ފަރުވާ ދެމުން ދަނިކޮށް ރޭ ދަންވަރު 2 ޖަހާކަށް ހާއިރުއެވެ.
އުމުރުން 61 އަހަރުގައި މުޖްތާޒު އަވަހާރަވި އިރު އެމަނިކުފާނަކީ ރާއްޖޭގެ އިންތިގާލީ މަރުހަލާގައި ސްުޕްރީމް ކޯޓުގައި ފަނޑިޔާރުކަން ކުރެއްވި ބޭފުޅެކެވެ. އެގޮތުން ސެޕްޓެމްބަރު 18، 2008 އިން އޮގަސްޓް 10، 2010 އާ ހަމަޔަށް ސުޕްރީމް ކޯޓުގެ ފަނޑިޔާރުކަން ކުރެއްވި ބޭފުޅެކެވެ.
ޝަރުއީ ދާއިރާއަށް 29 އަހަރަށް ހިދްމަތް ކުރެއްވުމަށް ފަހު މިާރު ރިޓަޔާ ކުރައްވާފައިވާ މުޖްތާޒަކީ ކުރިން މަދަނީ ކޯޓުގެ އިސް ގާޒީކަން ކުރައްވާ ފައިވާ ބޭފުޅެކެވެ.
މުޖްތާޒުގެ ޖަނާޒާ މިއަދު 11:30 ގައި ހުޅުމާލެ ސަހަރާގައި ބޭއްވުމަށް ވަނީ ނިންމާފައެވެ.