ޓޫރިސްޓް ރިސޯޓްތަކުން ގިނަ އަދަދަކަށް މޫދަށް ކުނި އަޅަމުންދާ މައްސަލައާއި ގުޅިގެން ކަމާގުޅޭ އިދާރާތަކާއި ބައްދަލުކުރުމަށް ރައްޔިތުންގެ މަޖިލީހުގެ އެންވާރަމެންޓް އެންޑް ކްލައިމެޓް ޗޭންޖް ކޮމިޓީން ނިންމައިފި އެވެ.
މިއަދު ބޭއްވި އެންވާރަމެންޓް ކޮމިޓީ ބައްދަލުމުގައި ނިންމާފައިވަނީ 'ފަތުރުވެރިކަމުގެ ދާއިރާގައި ތިމާވެށި ހިމާޔަތްކޮށް ރައްކާތެރިކުރުމާ ބެހޭ ގަވާއިދު'އިން ބާރު ލިބިގެން ޓޫރިސްޓު ރިސޯޓުތަކުން ގިނަ އަދަދަކަށް މޫދަށް ކުނި އަޅަމުންދާ މައްސަލައާއި ގުޅޭގޮތުން, އެންވާރަމެންޓް މިނިސްޓްރީއާއި އެންވާރަމެންޓް ޕްރޮޓެކްޝަން އެޖެންސީ (އެޗްޕީއޭ)އާއި, ޓޫރިޒަމް މިނިސްޓްރީއާއި ވޭސްޓް މެނޭޖްމެންޓް ކޯޕަރޭޝަން އަދި މޯލްޑިވްސް އެސޯސިއޭޝަން އޮފް ޓޫރިޒަމް އިންޑަސްޓްރީގެ ބޭފުޅުންނާ ބައްދަލުކުރުމަށެވެ.
މީގެ އިތުރުން މިކޮމިޓީ ބައްދަލުވުމުގައިވަނީ, ރާއްޖޭގައި ލިކުއިފައިޑް ނެޗުރަލް ގޭސް ސްޓޭޝަނެއް އެޅުމަށް, އޭޝިއަން ޑިވެލޮޕްމަންޓް ބޭންކު (އޭޑީބީ)އިން ފަންޑު ކުރުމަށް ނިންމާފައިވާ މައްސަލައާއި ގުޅިގެން, އެންވާރަމެންޓް މިނިސްޓްރީއާއި ޔުޓިލިޓީ ރެގިއުލޭޓަރީ އޮތޯރިޓީއާއި އިކޮނޮމިކް މިނިސްޓްރީގެ އިތުރުން ފެނަކަ ކޯޕަރޭޝަނާއި ސްޓެލްކޯ އަދި ތިމާވެއްޓާބެހޭ މާހިރުންނާއި ބައްދަލުކޮށް މަޝްވަރާ ކުރުމަށްވެސް ނިންމާފަ އެވެ.