އިއްޔެ ހަވީރު ގެނބިގެން މަރުވި އަހުމަދު ފައިޒާން އަޅުގަނޑުމެންނާއި ވަކިވެގެން ދިޔައީ ގައުމު ރޮއްވާލާފައި ކަމަށް ރައީސް އިބްރާހިމް މުހައްމަދު ސޯލިހު ވިދާޅުވެއްޖެއެވެ.
ފައުޒާން ނިޔާވުމާއި ގުޅިގެން އެކަމުގެ ހިތާމަފާޅު ކުރައްވައި ރައީސް ސޯލިހު ވިދާޅުވީ އަޙްމަދު ފައުޒާން އަޅުގަނޑުމެންނާ ވަކިވެގެން އެ ދިޔައީ ހިތްވަރުގަދަކަމުގެ ލާމަސީލު ނަމޫނާ ދައްކުވައިދީފައިކަމަށެވެ.
"އަޙްމަދު ފައުޒާން އަޅުގަނޑުމެންނާ ވަކިވެގެން އެ ދިޔައީ ހިތްވަރުގަދަކަމުގެ ލާމަސީލު ނަމޫނާ ދައްކުވައިދީފައި. އޭނާގެ އެ ޤުރުބާނީން ޤައުމު ރޮއްވައިލާފައި. އަޅުގަނޑުގެ ދުޢާއަކީ ފައުޒާނަށް ސުވަރުގޭގެ ދާއިމީ ނިޢުމަތް މިންވަރުކޮށްދެއްވުން".
ފައުޒާން ގެނބިގެން މަރުވެފައިވަނީ މޫދަށް އެރި އުޅުނު ދެ އަންހެން ކުދިން ގެނބެމުން ދަނިކޮށް އެކުދިން ސަލާމަތް ކުރުމަށް އޭނާ އާއި އިތުރު އެކުވެރިޔަކާއި އެކު މަސައްކަތް ކުރަމުންދަނިކޮށެވެ. ފައުޒާން ވަނީ ގެނބެމުން ދިޔަ ކުއްޖާގެ ފުރާނަ ސަލާމަތް ކޮށްފައެވެ.
މި ހާދިސާ ހިނގާފައިވަނީ އިއްޔެ ހަވީރުއެވެ.
ފައުޒާން ގެއްލިގެން ފުލުހުންނަށް ރިޕޯޓުކޮށްފައިވަނީ އިއްޔެ ހަވީރު 16:47 ހާއިރު ކަމަށްވާއިރު، އެ ސަރަހައްދު މޫދު އަޑިން މިއަދު ހަވީރު 17:50 ހާއިރު އޭނާ ވަނީ ފެނިފައެވެ. ފައުޒާން ނިޔާވެފައިވަނީ ހޮސްޕިޓަލަށް ގެންގޮސް ފަރުވާ ދެމުންދަނިކޮށެވެ.