ގއ. ދެއްވަދޫގައި ކޮވިޑު ފެތުރި ރަށް ބަންދު ކުރުމާއި ގުޅިގެން އެރަށުގެ ރައްޔިތުންނަށް އެހީތެރިވުމަށް މުޅި ހުވަދޫ އެކު އެކީގައި ތެދުވެއްޖެއެވެ.
ދެއްވަދޫ ރައްޔިތުންނަށް އެހީތެރިކަން ފޯރުކޮށްދޭން ހުވަދޫގެ އެކި ރަށްތަކުން އަންނަނީ ތަފާތު ހަރަކާތްތައް ހިންގަމުންނެވެ. އެގޮތުން ރައްޔިތުންނަސް ބޭނުންވާ އަސާސީ ތަކެއްޗާއި ފައިސާގެ އެހީތެރިކަން ދިނުމަށް އަންނަނީ ތަފާތު ހަރަކާތްތައް ހިންގަމުންނެވެ.
ކޮވިޑު ބަލިމަޑުކަން ދެއްވަދޫގައި ފެތުރި ރަށުގެ ރައްޔިތުން ބޮޑު ބިރުވެރިކަމެއްގައި ތިބި ވަގުތު ހުވަދޫގެ އެހެން ރަށްތަކުން ދައްކަމުންދާ ނަމޫނާ އަކީ އާދަޔާ ހިލާފު ނަމޫނާއެކެވެ.
ދެއްވަދޫއަށް އެހީތެރިކަން ފޯރުކޮށްދިނުމަށް ރަށު ކައުންސިލުން އެދުމާއި ގުޅިގެން ގއ. ކައުންސިލުން ވަނީ ރަށައް ބޭނުންވާ ބޯފެން ފޯރުކޮށްދީފައެވެ. މީގެ އިތުރުން ރައްޔިތުންނަށް ބޭނުންވާ ރޯ މަސް އަތޮޅުގެ އެކި ދޯނިތަކުން އަންނަނީ އެރަށައް ގެނެސްދެމުންނެވެ.
ތިނަދޫ އާއި ގެމަނަފުށީގެ ޖަމިއްޔާ ތަކާއި ރައްޔިތުން ގުޅިގެން އެހީގެ ތެކެތި އެއް ކުރަމުން އަންނަ އިރު ވަކިވަކި ގެތަކަށް ތަކެތި ދެވޭނެ އިންތިޒާމު ވަނީ ހަމަޖައްސާފައެވެ.
ގެމަނަފުށީގައި މިއަދު ހިންގާ އެހީ ހޯދުމުގެ ހަރަކާތް މިއަދު ހަވީރު 6 ޖަހަންދެން ކުރިއަށް ގެންދިއުމަށް ވަނީ ނިންމާފައެވެ. މިހާތަނަށްވެސް ގިނަ ބަޔަކު އެހީތެރިވެފައިވާއިރު ގެމަނަފުށީ ރައްޔިތުން ބުނީ ދެއްވަދޫ ރައްޔިތުން ހާލުގައި ޖެހިޔަ ނުދޭނެ ކަމަށެވެ.
ކޮވިޑުގެ ހާލަތަށް ބަލާ އިރު ރޭގެ ނިޔަލަށް 33 މީހަކު ވަނީ ބައްޔަށް ޕޮޒިޓިވްވެފައެވެ. މިހާތަނަށް ބަލި ޖެހުނު އެއްވެސް މީހެއްގެ ހާލު ސީރިއަސް ނޫންކަމަށް ކައުންސިލުން ވަނީ ބުނެފައެވެ.