ކޮވިޑް-19 ޖެހިގެން ދުނިޔެއިން މަރުވި މީހުންގެ އަދަދު ދެ މިލިއަނުން މައްޗަށް އަރައިފި އެވެ.
ކޮވިޑް-19 ދުނިޔޭގައި ފެތުރެން ފެށިފަހުން އަހަރެއްވެފައިވާ އިރު މިހާތަނަށް މިބައްޔަށް ދުނިޔެއިން 93.8 މިލިއަން މީހުން ޕޮޒިޓިވްވެފައިވާ ކަމަށް ރިޕޯޓްކޮށްފައިވެ އެވެ.
ދެ މިލިއަން މީހުން މި ބަލީގައި ދުނިޔެއިން މަރުވެފައިވާއިރު އެންމެ ގިނަ މީހުން މަރުވިކަމަށް ރިޕޯޓްކޮށްފައިވަނީ އެމެރިކާއިންނެވެ. އެ ގައުމުގައި 388،785 މީހުން މި ބަލީގައި މަރުވެފައިވެ އެވެ. ދެވަނައަށް އެންމެ ގިނަ މީހުން މަރުވެފައިވާ ބްރެޒިލްގައި 207،095 މީހުން މިބަލީގައި މަރުވި ކަމަށް ރިޕޯޓްކޮށްފައިވާއިރު ތިން ވަނައަށް އެންމެ ގިނަ މީހުން މަރުވެފައިވަނީ އިންޑިއާއިންނެވެ. އެގައުމުގައި މަރުވި މީހުންގެ އަދަދު އުޅެނީ 151،918 ގަ އެވެ.
ކޮވިޑް-19 ކޮންޓްރޯލް ކުރުމަށް ކުރި މަސައްކަތުގެ ތެރެއިން ނިމުނު 2020 ވަނަ އަަހަރު ގިނަ ޤައުމުތަކުން ތިބީ ބޯޑަރުތައް ބަންދުކޮށް ލޮކްޑައުންގަ އެވެ. އެހެންނަމަވެސް ކޮވިޑްގެ ވެކްސިންއެއް ލިބި މިހާރު ގައުމުތަކުގައި އަންނަނީ ރައްޔިތުންނަށް ވެކްސިން ދިނުމުގެ މަސައްކަތް ކުރަމުންނެވެ.