ރާއްޖެއަށް މަސްތުވާތަކެތި އެތެރެކުރި މައްސަލައިގައި 18 އަހަރަށް ޖަލަށް ހުކުމް ކޮށްފައިހުރި މ. ލޮނުމިދިލިގޭ އިބްރާހީމް ޝަފާޒް އަބްދުއްރައްޒާގު ގަވައިދާ ހިލާފަށް ރާއްޖެއިން ފުރުވާލި މައްސަލައިގެ ޝަރީއަތުގެ އަޑުއެހުން އާދީއްތަ ދުވަހަށް ތާވަލު ކޮށްފި އެވެ.
ރާއްޖެއަށް މަސްތުވާތަކެތި އެތެރެކޮށް ވިއްކާ ނެޓްވޯކެއްގެ ބޮޑެއްގެ ގޮތުގައި ފާހަގަކޮށްފައިވާ ސަފާ ފުރުވާލި މައްސަލައިގައި މަޤާމުގެ ނުފޫޒު ބޭނުންކޮށްގެން ނާޖައިޒު ފައިދާ ހޯދައިދިނުމުގެ ކުށުގެ ދައުވާ އުފުލާފައިވަނީ ކުރީގެ ކޮމިޝަނާ އޮފް ޕްރިޒަން މޫސާ އާޒިމް އާއި އޭރު ހޯމް މިނިސްޓްރީގެ ޑެޕިއުޓީ މިނިސްޓަރުގެ މަގާމުގައި ހުރި މުހައްމަދު ހާނިމްގެ މައްޗަށެވެ. ޝަރީއަތް ތާވަލުކޮށްފައިވަނީ މާދަމާ ހެނދުނު 11:30 ހަށެވެ.
އެ މައްސަލައިގެ އިބްތިދާއީ އަޑުއެހުންތައް މިދިޔަ ހަފްތާ އަންގާރަ ދުވަހު ނިންމާލާފައިވާއިރު މާދަމާގެ އަޑުއެހުމުގައި އޮންނާނީ ހެކިބަސް ނެގުމެވެ.
މި މައްސަލައިގައި މީގެ ކުރިން ހާނިމް އާއި އާޒިމް ދައުވާއަށް އިންކާރުކޮށްފައިވެ އެވެ. އަދި ދިފާއުގައި ހެކިންވެސް ހުށަހަޅާފައިވެ އެވެ. ކްރިމިނަލް ކޯޓުން ނިންމާފައިވަނީ މި މައްސަލަ މައުޟޫއީ ގޮތުން ކުރިއަށްގެންދެވޭނެ ކަމަށެވެ.
ސަފާ ފުރުވާލި މައްސަލައިގައި ދެ މީހުންގެ މައްޗަށް ދައުވާ ކުރުމަށް އެންޓި ކޮރަޕްޝަން ކޮމިޝަން (އޭސީސީ) މައްސަލަ ޕީޖީއަށް ފޮނުވީ 2014 ވަނަ އަހަރު އެވެ. ޕްރޮސެކިއުޓާ ޖެނެރަލްގެ އޮފީހުން ދައުވާ ކުރީ 2018 ވަނަ އަހަރުގެ ޖެނުއަރީ މަހުގެ ތެރޭގަ އެވެ. ސަފާ ރާއްޖެއިން ބޭރަށް ފުރުވާލި މައްސަލައިގައި އައިޖީއެމްއެޗްގެ ޑޮކްޓަރަކާއިި، ކަރެކްޝަނަލް ސާވިސްގެ އޭރުގެ މެޑިކަލް ބޯޑުގެ ދެ މެމްބަރަކާއި، މާލޭ ޖަލުގެ ކުރީގެ ޗީފް ސުޕްރިންޓެންޑެންޓުގެ މައްޗަށްވެސް ދައުވާ ކުރަން އޭސީސީއިން ފޮނުވި އެވެ. ނަމަވެސް، އެ މީހުންނަށް ދައުވާކޮށްފައި ނުވެ އެވެ. ސަފާ ގަވައިދާއި ހިލާފަށް ފުރުވާލި ފަހުން އަނބުރާ ރާއްޖެ ގެނެސްފައިވެ އެވެ. ނަމަވެސް ހައިކޯޓުން ވަނީ އޭނާގެ މައްޗަށް އިއްވާފައިވާ ހުކުމް ބާތިލުކޮށްފަ އެވެ.