149 ކިލޯ ޑްރަގްސްގެ މައްސަލަ ކޯޓުން ބޭރުކޮށްލި މައްސަލައިގައި ޕްރޮސިކިއުޓާ ޖެނެރަލް ހުސައިން ޝަމީމް ރައްޔިތުންގެ މަޖިލީހުގެ ޖުޑިޝަރީ ކޮމިޓީއަށް ހާޒިރުކުރަން ނިންމައިފި އެވެ.
މިއަދު ބޭއްވި ޖުޑިޝަރީ ކޮމިޓީންގެ ބައްދަލުވުމުގައި ނިންމާފައިވަނީ 149 ކިލޯގެ މަސްތުވާތަކެތީގެ މައްސަލަ ކޯޓުން ބޭރުކޮށްލުމުން އަދި އިސްތިއުނާފު ނުކުރުމަށް ނިންމުމުން އެމައްސަލާގައި ކަން ހިނގި ގޮތް ސާފު ކުރުމަށް ޕީޖީ ޝަމީމް ކޮމިޓީއަށް ހާޒިރުކުރުމަށެވެ.
ފަޅުރަށެއް ކަމަށްވާ ގދ. ހުޅުވާރުލުން 2019 ވަނަ އަހަރު އަތުލައިގަތް 149 ކިލޯ މަސްތުވާތަކެތީގެ މައްސަލައިގައި ދައުވާކޮށްފައިވާ ފަސް މީހުންގެ މައްސަލަ ގދ. ގައްދޫ ކޯޓުން ބޭރުކޮށްލާފައިވަނީ ދައުވާކުރުމަށް ބަޔާންކޮށްފައިވާ މުއްދަތުގެ ފަހުން ދައުވާ ކޮށްފައިވާކަމަށް ބުނެ އެވެ.
މީގެ ކުރިން މި މައްސަލައިގައި ކްރިމިނަލް ކޯޓުގައި ދައުވާ ކުރި އިރު، އިބްތިދާއީ މަރުހަލާގައި އިޖުރާއީ ނުކުތާއެއް ނަގާ އެ މައްސަލަ ހުށަހަޅަން ޖެހޭނީ ކުށުގެ އަމަލު ހިނގި ސަރަހައްދުގެ ކޯޓަކަށް ކަމަށް ބުނުމުން ކްރިމިނަލް ކޯޓުން ވަނީ އެ މައްސަލަ ބޭރުކޮށްލާފަ އެވެ. އަދި ދައުލަތުގެ ފަރާތުން އެ ނިންމުން ހައިކޯޓުގައި އިސްތިއުނާފު ކޮށްފަ އެއް ނުވެ އެވެ.
މި މައްސަލަ ގައްދޫ ކޯޓުން ބޭރުކޮށްލުމުން ޕީޖީން ނިންމީ އެ މައްސަލަ އިސްތިއުނާފު ނުކުރުމަށެވެ.
މި މައްސަލައިގައި ދައުލަތުން ދައުވާ ކޮށްފައިވާ ފަސް މީހުންނަކީ، ގއ. ކޮނޑޭ، ގަހާކޯޅި އަހުމަދު އަނީލް (34)، ގދ. ގައްދޫ، އެދުރުގެ، އަހުމަދު ހާމީމު (42)، ގއ. ކޮނޑޭ، ރޮމޭންސް ޝަފީޒް މުހައްމަދު (35)، ގއ. ނިލަންދޫ، ދިހްޝާންވިލާ އަލީ ޝާކިރު (30) އަދި ގދ. ގައްދޫ، އެދުރުގެ ޔާމިހް ހާލިދު (23) އެވެ. މި މައްސަލައިގައި ހަތަރު މީހެއްގެ މައްޗަށް ޑައިމޯފިން ޓްރެފިކް ކުރުމުގެ ދައުވާ ކޮށްފައިވާއިރު ފަސްވަނަ މީހާގެ މައްޗަށް ކޮށްފައިވަނީ ޑައިމޯފިން ޓްރެފިކްކުރުމުގައި ބައިވެރިވުމުގެ ދައުވާ އެވެ. މި ތަކެތި ފުލުހުން 2019 ވަނަ އަހަރު އަތުލައިގެންފައި ވަނީ އެ ރަށުގައި ވަޅުލާފައި ހުއްޓަ އެވެ.