ސ. ފޭދޫ ސިއްހީ މަރުކަޒުގެ ޖާގަ ކޮންޓްރެކްޓް އުސޫލުން ބޮޑުކޮށްދޭނެ ފަރާތެއް ހޯދަން ކުރި އިއުލާނާ ގުޅިގެން އެންމެ ފަރާތަކުން ކުރިމަތިލާފައިވާތީ، އަލުން ބީލަމަށް ލައި، ޕްރޮޕޯސަލް ހުށަހެޅުމުގެ ފުރުސަތު ހުުޅުވާލައިފި އެވެ.
ސިއްހީ މަރުކަޒު ހިންގެވުމާ ހަވާލުވެ ހުންނެވި އިހުތިޝާމް ނަޖީބް (އިންތާ) މިއަދު ވިދާޅުވީ މި މަހުގެ 26 ގައި މުއްދަތު ހަމަވި އިރު، ޕްރޮޕޯސަލް ހުށަހެޅީ އެންމެ ފަރާތަކުން ކަމަށެވެ.
އިންތާ ވިދާޅުވީ ނުވަ ފަރާތަކުން މައުލޫމާތު ސާފު ކުރި ކަމަށެވެ. އެހެން ނަމަވެސް އެންމެ ފަރާތަކުން ޕްރޮޕޯސަލް ހުށަހެޅުމުން ކުރިން ކުރި އިއުލާން ބާތިލްކޮށް އަލުން އިއުލާން ކުރީ ކަމަށް އޭނާ ވިދާޅުވި އެވެ.
އަލުން ފުރުސަތު ހުޅުވާލި އިރު މިކަމާ ބެހޭ މައުލޫމާތު ދިނުން އޮކްްޓޯބަރު މަހުގެ 9 ވަނަ ދުވަހު އޮންނާނެ އެވެ. އަދި ޕްރޮޕޯސަލް އޮކްޓޯބަރު 16 ގައި ހުށަހަޅަން ޖެހެ އެވެ.
ސިއްހީ މަރުކަޒުގެ ޖާގަ ބޮޑު ކުރަން ކުރާ މަސައްކަތުގެ ދަށުން އެތަނުގެ ބޭސް އަޅާ ކޮޓަރި އާއި އިދާރީ އޮފީސް އެއްކޮށް އިމަޖެންސީ ރޫމެއް ހަދައި ބައެއް ބަދަލުތައް ގެންނަން ވަނީ ނިންމާފަ އެވެ.