ޓެކްސީ ޑްރައިވަރު ޤާސިމް އިބްރާހިމް މަރާލި މައްސަލައިގައި ދައުވާ އުފުލާފައިވާ އަދުހަމް މުހައްމަދު ޝަރިއަތަށް ބަޔާނެއް ދޭންބޭނުންވާ ކަމަށް ބުނެފި އެވެ.
ޤާސިމް މަރާލި މައްސަލައިގައި މިއަދު ކުރިއަށް ގެންދިޔަ އަޑުއެހުމުގައި އަދުހަމް ބުނެފައިވަނީ އެ މައްސަލައާއި ގުޅިގެން އޭނާ ބަޔާނެއް ދޭންބޭނުންވާ ކަމަށެވެ. އަދި އަދުހަމް އެގޮތަށް ބުނުމުން ގާޒީ ވަނީ އޭނާއަށް އެ ފުރުސަތު ދެއްވުމަށް ނިންމަވާ މިއަދުގެ އަޑުއެހުން ނިންމާލައްވާފަ އެވެ. އަދި އިތުރު އަޑުއެހުމެއް މި މަހުގެ 25 ވަނަ ދުވަހު ބާއްވާނެ ކަމަށް ވިދާޅުވި އެވެ.
ޤާސިމް މަރާލި މައްސަލައިގައި އަދުހަމްގެ މައްޗަށް އުފުލާފައިވަނީ ޤަސްދުގައި މީހަކު މެރުމުގެ ދައުވާ އެވެ.
މި މައްސަލައިގެ އަޑުއެހުމެއް މިމަހު 17 ވަނަ ދުވަހަށްވެސް ތާވަލުކުރި އެވެ. އެހެންނަމަވެސް އެދުވަހު އަދުހަމްގެ ވަކީލުގެ އެދުމަށް އަޑުއެހުން ކެންސިލް ކުރީ އެވެ.
މި މައްސަލައިގައި އެންމެ ފުރަތަމަ ބޭއްވި އަޑުއެހުމުގައި އަދުހަމް ވަނީ ޤާސިމް މަރާލި ކަމަށް އިއުތިރާފްވެފަ އެވެ. އެހެން ނަމަވެސް މައްސަލައިގައި އަވަސްނިޔާގެ ދަށުން ބޭއްވި އަޑުއެހުމުގައި އަދުހަމް ވަނީ އިއުތިރާފް އަނބުރާ ގެނެސްފަ އެވެ.
ޓެކްސީ ޑްރައިވަރު ގާސިމް މަރާލާފައި އޮށްވާ ފެނުނީ 2019 ޑިސެމްބަރު ހަތަރުވަނަ ދުވަހު އެވެ.