ފުލުހުންގެ ބެލުމުގެ ދަށަށް ގެންދެވޭ ފަރާތްތަކުގެ ކުޑަކަމުދާ ތަކެތި ތަޙްލީލު ކުރުމަށް ސާމްޕަލް ނަގާ އިރު ކުޑަކަމުދާ ތަކެތި ރައްކާ ކުރާ ދަޅުފަދަ ތަކެތީގައި މަސްތުވާ ތަކެތީގެ އަސަރު ހުންނަ ކަހަލަ އެއްޗެތި ބޭނުން ކޮށްފައި ހުންނަ ކަމަށް ރައްޔިތުންގެ މަޖުލީހުގެ މަނަދޫ ދާއިރާގެ މެމްބަރު މުޙައްމަދު ޠާރިޤު ކުރެއްވި ތުހުމަތާ ގުޅިގެން އެފަދަ ގޮތަކަށް އެކަން ހިނގަމުން ދޭތޯ ބަލައި ރައްޔިތުންނަށް ކަމުގެ ޙަޤީޤަތް ހާމަކޮށް ދެއްވުމަށް މޯލްޑިވްސް ޕޮލިސް ސަވިސްގެ ޕްރޮފެޝަނަލް ސްޓޭންޑަޑް ކޮމާންޑުން މި މައްސަލަ ޕޮލިސް އިންޓަގްރިޓީ ކޮމިޝަން (ޕީއައިސީ) އަށް ހުށަހަޅައިފި އެވެ.
ޕްރޮފެޝަނަލް ސްޓޭންޑަޑް ކޮމާންޑުން ޕޮލިސް ޕީއައިސީ އަށް އިއްޔެ ހުށަހެޅި މި މައްސަލާގައި އެދިފައި ވަނީ ރައްޔިތުންގެ މަޖުލީހުގެ މަނަދޫ ދާއިރާގެ މެމްބަރު މުޙައްމަދު ޠާރިޤު ކުރައްވާފައިވާ ތުހުމަތާއި ގުޅިގެން ފުލުހުންގެ މަސައްކަތަށާއި ފުލުހުންގެ ތަޙުޤީޤާ ދޭތެރޭ ރައްޔިތުންގެ އިތުބާރު ކުޑަވެ ރައްޔިތުންގެ ހިތްތަކުގައި ފުލުހުންނާއި ފުލުހުންގެ މަސައްކަތާއި ތަޙުޤީޤާ ދޭތެރޭ ޝައްކު އުފެދުމުގެ ފުރުޞަތު ލިބިގެން ދާނެތީ އެކަންކަން އޮންނަ ގޮތް ރައްޔިތުންނަށް ސާފުކޮށް ދެއްވުމަށެވެ.
އެގޮތުން އެކިއެކި ކަންކަމުގައި ފުލުހުންގެ ބެލުމުގެ ދަށަށް ގެނެވޭ މީހުން ކުޑަކަމުދާ ތަކެތި ތަޙުލީލު ކުރުމަށް ސާމްޕަލް ނަގާ އިރު އެ ތަކެތި ރައްކާ ކުރާ ދަޅުފަދަ ތަކެތީގައި ކުޑަކަމުދާ ތަކެތީގެ އަސަރު ހުންނަ ކަހަލަ އެއްޗެހި ފުލުހުން ޔޫރިން ނެގުމަށް ދޭ ތަށްޓަށް އަޅާފައި ދިނުމާއި މިޒާތުގެ ނުބައި ޖަރީމާތައް ފުލުހުން ހިންގަމުންދާކަމަށް ރައްޔިތުންގެ މަޖުލީހުގެ މަނަދޫ ދާއިރާގެ މެމްބަރު މުޙައްމަދު ޠާރިޤު ކުރައްވާފައިވާ ތުހުމަތު ބައްލަވައި ދެއްވައި އެކަން އިންތިޒާމުވެފައި އޮންނަގޮތް ހާމަކޮށް ދެއްވުމަށް ޕޮލިސް އިންޓަގްރިޓީ ކޮމިޝަންގައި ފުލުހުން އެދިފައިވެ އެވެ.
ހަމަ މި އާއެކު މިފަދަ ތުހުމަތު ތަކަކީ އޭގެ ޙަޤީޤަތް ރައްޔިތުންނަށް ވަރަށް ރަނގަޅަށް އޮޅުންފިލާފައި އޮންނަން ޖެހޭނެ ކަންތައްތަކަކަށް ވާތީ އެކަން ވީ އެންމެ އަވަހަކަށް ރައްޔިތުންނަށް ސާފުކޮށް ދެއްވުމަށް ވެސް ޕޮލިސް އިންޓަގްރިޓީ ކޮމިޝަންގައި އެދުނު އެދުމުގައި ވެ އެވެ.