ޝާހިދު ކަޕޫރާއި ސޮނާކްށީ ސިންހާ ފުރަތަމަ ފަހަރަށް ސްކްރީނަށް އަންނަން ތައްޔާރުވެއްޖެ އެވެ.
އެ ދެ ތަރިން އެކުގައި ސްކްރީނުން ފެންނަ ފުރަތަމަ ފިލްމަކީ ޕްރަބޫދޭވާ ޑައިރެކްޓްކޮށްފައިވާ "އާރް…ރާޖްކުމާރް" އެވެ.
މި ފިލްމް ރިލީޒް ކުރަން ހަމަޖެހިފައި ވަނި ޑިސެމްބަރު މަހުގެ 6 ވަނަ ދުވަހު އެވެ.
ކުރިން މި ފިލްމްގެ ނަމަކަށް ހަމަޖެއްސީ "ރާމްބޯ ރާޖްކުމާރް" އެވެ. އެހެން ނަމަވެސް "ރާމްބޯ" އަކީ ހޮލީވުޑްގައި ކޮޕީރައިޓްކޮށްފައިވާ ޓައިޓްލްއަކަށްވުމުން ނަން ބަދަލު ކުރީ އެވެ.
ޝާހިދާއި ސޮނާކްޝީގެ އިތުރުން "އާރް…ރާޖްކުމާރުގައި" ސޯނޫ ސޫދާއި ޝްރަދާ ކަޕޫރު ވެސް މުހިއްމު ރޯލްތަކެއް އަދާކޮށްފައިވެ އެވެ.
ބެލެވޭ ގޮތުގައި މި ފިލްމް ވެގެން ދާނީ ޕްރަބޫދޭވާގެ އެންމެ ކާމިޔާބް ފިލްމްތަކުގެ ތެރޭގައި ހިމެނޭ "ވޯންޓެޑް" އާއި "ރައުޑީ ރާތޯޑް" ފަދަ ގިނަ އަދަދަކަށް ތަޅާ ފޮޅުމުގެ މަންޒަރުތަކުގެ އިތުރުުން މަސާލާ ގިނަ ރަހަތަކެއް ހިމެނޭ ބެލުންތެރިން ވަރަށް ގަޔާވާނެ ފިލްމަކަށެވެ.
ޕްރަބޫދޭވާ އެންމެ ފަހުން ގެނެސް ދިން "ރަމަޔާ ވަސްތާވަޔާ" އަށް ބެލުންތެރިންގެ ފަރާތުން މާ ބޮޑު ތަރުހީބެއް ލިބިފައެއް ނުވެ އެވެ. އެހެންވެ މި ފިލްމް ވެގެން ދާނީ އޭނާ އަށް މުހިއްމު ފިލްމަކަށެވެ.
ހަމަ އެގޮތަށް "އާރް…ރާޖްކުމާރް" އަކީ ޝާހިދު ކަޕޫރަށް ވެސް ވަރަށް މުހިއްމު ފިލްމަކަށް ވާނެ އެވެ.
ސަބަބަކީ ދާދި ފަހުން ރިލީޒްވި އޭނާގެ "ޕަޓާ ޕޯސްޓަރު ނިކްލާ" ހީރޯ" އާއި އޭގެ ކުރިން ރިލީޒްވި ޝާހިދުގެ ދެ ފިލްމް ކަމަށްވާ "ތޭރީ މޭރީ ކަހާނީ" އާއި "މޯސަމް" ވެސް ފްލޮޕްވެފައި ވުމެވެ.
އެހެންވެ ޝާހިދަށް ހިޓެއްގެ ބޭނުންތެރިކަން ވަނީ ބޮޑުވެފަ އެވެ.