ރުޅިވެރިކަމާއި ނަފްރަތާއި ބިރުވެރިކަން އުފެދޭފަދަ ވާހަކަތަކާއި ޢިބާރާތްތައް ވިދާޅުނުވުމަށާއި، ރާއްޖޭގެ ސިޔާސީ މަސްރަޙު ހޫނުވިޔަ ނުދެއްވުމަށް، ރާއްޖޭގެ ސިޔާސީ ފަރާތްތަކަށް ރައީސް ޑރ. މުޙަންމަދު ވަޙީދު މިއަދު އިލްތިމާސް ކުރައްވައިފި އެވެ.
ރައީސް މިކަމަށް އިލްތިމާސް ކުރެއްވީ، ރާއްޖޭގެ ސިޔާސީ މަސްރަޙާ ގުޅޭ ގޮތުން މިއަދު މެންދުރުފަހު 1:00 ޖެހި އިރު ދިވެހި ޤައުމާ މުޚާޠަބު ކުރައްވައި ވާހަކަފުޅު ދައްކަވަމުންނެވެ.
މި މޭރުމުން އެ މަނިކުފާނު ދެއްކެވި ވާހަކަފުޅުގައި، ދިވެހި ޤައުމުގެ މަތީ މަޞްލަޙަތު އިސް ކުރެއްވުމަށާއި، ޤާނޫނީ ޙުކޫމަތެއް ޤާއިމްކޮށް ހިންގުމަށްޓަކައި އުފެދިފައިވާ މުއައްސަސާތަކަށް އިތުބާރު ކުރައްވައި، ޤާނޫނު އަސާސީއާއި ޤާނޫނުތައް ނެގެހެއްޓުމުގައި އިޚްލާޞްތެރިކަމާއެކު ދެމިތިއްބެވުމަށް، ރާއްޖޭގެ ފުލުހުންނަށާއި ސިފައިންނަށް ގޮވާލެއްވި އެވެ.
އަދި ދިވެހި ޤައުމު، މި އުނދަގޫ މަރްޙަލާއިން ސަލާމަތް ކުރެއްވުމަށް، މާތްﷲގެ ޙަޟުރަތުގައި ދުޢާ ދެންނެވުމުގައި ދެމި ތިއްބެވުމަށް، ރާއްޖޭގެ ރައްޔިތުންނަށް އިލްތިމާސް ކުރެއްވި އެވެ.
ރައީސް ދިވެހި ޤައުމާ މުޚާޠަބު ކުރައްވައި މިއަދު ދެއްކެވި ވާހަކަފުޅުގައި، ޑިމޮކްރެޓިކް ވެރިކަމެއްގައި، ރައްޔިތުންގެ އެންމެ ބޮޑު ޙައްޤަކީ، މިނިވަންކަމާއި އިންޞާފުވެރިކަމާއެކު ވޯޓްލުމުގެ ޙައްޤު ކަމުގައި ވިދާޅުވި އެވެ.
ރައީސް ވިދާޅުވި ގޮތުގައި، މިނިވަން ދައުލަތެއްގެ އެންމެ އިސް ވާޖިބަކީ، ކޮންމެ މީހެއްގެ ވޯޓަށް އަމާނާތްތެރިވުމެވެ. ކޮންމެ ވޯޓެއް ގުނުމެވެ. އަދި ހަމަ އެކަކަށް ވެސް އެއް ވޯޓަށް ވުރެ ގިނަ ވޯޓްލުމުގެ ފުރްޞަތު ނުދިނުމެވެ.
ސެޕްޓެމްބަރު 7 ގައި އޮތް ރިޔާސީ އިންތިޚާބުގެ ފުރަތަމަ ބުރުގެ ވޯޓާ ގުޅިގެން އިލެކްޝަންސް ކޮމިޝަނަށް ޝަކުވާ އުފުލި އަދި އިންތިޚާބުގެ ވޯޓުގެ މައްސަލަތަކެއް ހުރި ކަމަށް ފާހަގަކުރެވިގެން، އިންތިޚާބުގައި ބައިވެރިވެވަޑައިގެންނެވި ކެންޑިޑޭޓެއްގެ ފަރާތުން އެ މައްސަލަ، ޤާނޫނުގައިވާ ގޮތުގެ މަތިން ސުޕްރީމް ކޯޓަށް ވަނީ ހުށަހަޅުއްވާފައި ކަމުގައި ރައީސް ވިދާޅުވިއެވެ.
އެއަށް ފަހު، ހިނގަމުންމިދާ ކަންތައްތަކުގެ ސަބަބުން މިއަދު ދިވެހި ޤައުމު މިވަނީ އަނެއްކާ ވެސް ވަރަށް ބޮޑު ހާސްކަމެއްގެ ތެރެއަށް ގޮސްފައިވާކަން ރައީސް ފާހަގަ ކުރެއްވި އެވެ.
މި ރޮނގުން ވާހަކަފުޅު ދައްކަވަމުން، މިހާތަނަށްވެސް އަޅުގަނޑުމެންނަށް ދިމާވެފައިވާ އުނދަގޫ ސިޔާސީ ކަންކަމުގެ ތެރެއިން އަރައިގެންފައި ވަނީ، ކެތްތެރިކަމާއި ޞުލްޙަވެރިކަމާ އެކު މަސައްކަތްކޮށްގެން ކަމަށާއި، ވޯޓްގެ މައްސަލައިގައި ދިމާވެފައިވާ މައްސަލަތައް، ޞުލްޙަވެރިކަމާ އެކު ޙައްލުކޮށް، ރިޔާސީ އިންތިޚާބު ކުރިއަށް ގެންގޮސް ނިންމޭނެ ކަމުގެ ފުރިހަމަ ޔަޤީންކަން ލިބިވަޑައިގެންފައިވާ ކަމަށް ވިދާޅުވި އެވެ.
ރައީސްގެ ވާހަކަފުޅުގައި، ރިޔާސީ އިންތިޚާބުގެ ފުރަތަމަ ބުރުގެ ނަތީޖާ އާ މެދު ސުޕްރީމް ކޯޓުގެ ނިންމެވުމެއް، ވެވަޑައިގެންނެވި އެންމެ އަވަހަކަށް ނެރުއްވައި ދެއްވުމަކީ، މައްސަލަ ފިނިކުރުމަށްޓަކައި އެޅޭ ވަރަށްބޮޑު ބާރަކަށްވާނެ ކަމުގައި ވިދާޅުވި އެވެ.
އަދި ހަމައެހެން، ވޯޓް އޮޅުވާލެވިފައިވާ ކަމަށް ކުރެވޭ ތުހުމަތުތަކަކީ، ޙަޤީޤީ ހެކިތަކެއް ހުރި ކަންތައްތައް ކަމަށްވާ ނަމަ، އެކަން ސާބިތު ކުރެވުމަކީ، މި މައްސަލަ ޙައްލު ކުރުމަށް ކޮންމެހެން ކުރަން ޖެހޭ ކަމެއް ކަމަށް ވިދާޅުވި އެވެ.
މިއަދު ރިޔާސީ ކެންޑިޑޭޓުންނާއި، ސިޔާސީ ޕާޓީތަކާއި، ދިވެހި ރައްޔިތުންނާއި، އަދި ދުނިޔޭގެ އެހެނިހެން ޤައުމުތަކާއި ޖަމްޢިއްޔާތައް އިންތިޒާރު ކުރަމުން ދަނީ، އަވަސް މުއްދަތެއްގެ ތެރޭގައި، ޞުލްޙަވެރިކަމާއެކު އިންތިޚާބު ބޭއްވި، އިންތިޚާބުވާ ރައީސަކު، ނޮވެމްބަރު 11 ގައި ސަރުކާރާ ޙަވާލުވުމަށް ކަމަށް ވެސް ރައީސް ވިދާޅުވިއެވެ.
މި މަޤްޞަދު ޙާޞިލު ކުރެއްވުމަށްޓަކައި ސަރުކާރުން ކުރައްވަން ޖެހޭ ހުރިހާ ކަމެއް ކުރައްވާނެ ކަމުގެ ޔަޤީންކަން ދެއްވިއެވެ. އަދި ދިވެހި ރައްޔިތުންނާއި، ސިޔާސީ ބޭފުޅުން ކެތްތެރިވެވަޑައިގަތުމަށް ރައީސް ގޮވާލައްވައި، ދިވެހި ރާއްޖޭގެ ޤާނޫނު އަސާސީ އާއި ޤާނޫނުތަކަށް ބޯލެނބުމަށާއި އަދި މުޖްތަމަޢުގައި ޞުލްޙަ މަސަލަސްކަން ދެމެހެއްޓެވުމަށް އިސްކަން ދެއްވުމަށް ވެސް ގޮވާލެއްވި އެވެ.
ރައީސްގެ ވާހަކަފުޅުގައި، ބައިބައިވުމާއި ހަމަނުޖެހުން އުފެދޭ ކޮންމެ ވަގުތަކީ، ބޭރުގެ ފަރާތްތަކުން އަޅުގަނޑުމެންގެ ދާޚިލީ ކަންކަމުގެ ތެރެއަށް ވަނުމަށް ހުޅުވާލެވޭ ދޮރެއް ކަމުގައި ވިދާޅުވި އެވެ.
އަދި މި ވަގުތަކީ ވެރިކަން ހިންގުމުގެ ތިންބާރުގެ ތެރޭގައި ހަމަނުޖެހުން އުފައްދަންވީ ވަގުތެއް ނޫން ކަމަށާއި، އެއްބާރުން އަނެއް ބާރަށް ޙަމަލާ ދޭންވީ ވަގުތެއް ވެސް ނޫން ކަމަށް ވިދާޅުވި އެވެ. އެކަމަކު މި ވަގުތަކީ ހަމަ ބުއްދި އިސްކޮށް، ރައްޔިތުންގެ ސަލާމަތާއި ރައްކާތެރި ކަމަށްޓަކައި ފާރަވެރިވާންވީ ވަގުތު ކަމަށާއި، އަޅުގަނޑުމެންގެ ސިޔާސީ އުންމީދުތަކަށް ވުރެ، ޤައުމުގެ މަޞްލަޙަތު އިސް ކުރަންވީ ވަގުތު ކަމުގައި ރައީސް ވިދާޅުވި އެވެ.