މިދިޔަ އަހަރު ފުލުހުން ހިންގި އޮޕަރޭޝަނެއްގައި އަތުލައިގަތް 61 ކިލޯގެ މަސްތިވާތަކެތި އެތެރެކުރުމުގެ ބޮޑެއްގެ ގޮތުގައި ހުރި މއ. ބޮއިލިންފިޝް އަހުމަދު ވިސާމު ބަންދުން ދޫކޮށްލިއިރު އެކަމާއި ގުޅޭގޮތުން ޕްރޮސިކިއުޓާ ޖެނެރަލް (ޕީޖީ) އޮފީހުން ކޯޓުގައި ވަކިކަމެއް ފާހަގަކޮށްފައި ނުވާކަމަށް ކްރިމިނަލް ކޯޓުން ބުނެފި އެވެ.
މިމަހުގެ 24 ވަނަ ދުވަހު ކްރިމިނަލް ކޯޓުން ވިސާމް ބަންދުން ދޫކޮށްލި މައްސަލަ ޕީޖީން ހައިކޯޓުގައި ވަނީ އިސްތިއުނާފު ކޮށްފަ އެވެ.
އެ މައްސަލައާއި ގުޅޭގޮތުން ކްރިމިނަލް ކޯޓުން ނެރުނު ބަޔާނެއްގައި ބުނެފައިވަނީ، ވިސާމްގެ ބަންދު މުރާޖައާ ކުރަން މިމަހުގެ 21 ވަނަ ދުވަހު އަޑުއެހުމެއް ބޭއްވި ކަމަށާއި އަޑުއެހުމުގައި ބަލި ހާލަތާއި ގުޅިގެން ޝަރީއަތުން ސުވާލުކުރުމުން ކަރެކްޝަނަލް ސާވިސްގެ ފަރާތުން އަޑުއެހުމަށް ހާޒިރުވެފައިވަނީ ފުލުހުގައި ހުރި ބައެއް މެޑިކަލް ޑޮކިއުމަންޓްސް ނުލާކަމަށް ބުނެފައިވާ ކަމަށެވެ. އެހެންކަމުން ޖެނުއަރީ 21 ވަނަ ދުވަހުގެ 12:00ގެ ކުރިން އެ ލިޔުންތައް ހުށަހެޅުމަށް ޕީޖީ އަށާއި މޯލްޑިވްސް ކަރެކްޝަނަލް ސަރވިސްއަށް ޝަރީއަތުން އެންގުމުންވެސް ކޯޓުގެ އެންގުމާ އެއްގޮތަށް ލިޔުންތައް ހުށަހަޅާފައެއްނުވާތީ ޖެނުއަރީ 21 ވަނަ ދުވަހު އެ މައްސަލައިގެ އަޑުއެހުމެއް ބޭއްވިފައި ނުވާ ކަމަށެވެ. އެލިޔުންތައް ލިބިފައިވަނީ ހަފްތާ ބަންދު ތެރޭ ކަމަށާއި ލިޔުންތައް ކޯޓަށް ލިބުމުން ޖެނުއަރީ 24 ވަނަ ދުވަހު އެމައްސަލައިގެ ބަންދު މުރާޖައަގެ އަޑުއެހުމެއް ބޭއްވި ކަމަށް ކޯޓުން ބުނެފައިވެ އެވެ.
ކްރިމިނަލް ކޯޓުން ބުނެފައިވަނީ ބަންދު މުރާޖައާގެ އަޑުއެހުންތަކުގައި ވިސާމްގެ ފަރާތުން ދެ ކަމެއް ފާހަގަކުރި ކަމަށެވެ. އެގޮތުން އޭނާ އަކީ ކަކުލަށް ލިބިފައިވާ އަނިޔާ އަކާއި ގުޅިގެން ލިގަމެންޓު އިރައިގެންގޮސް އޮޕަރޭޝަނެއް ކުރަން ޖެހިފައިވާ މީހެއްކަން ޝަރީއަތަށް ލިބިފައިވާ ލިޔުންތަކުން އެނގޭ ކަމަށާއި ނަމަވެސް އެ އޮޕަރޭޝަނަކީ އާޖެންޓް އޮޕަރޭޝަނެއް ނޫން ކަމަށް ޑޮކްޓަރު ބުނެފައިވާ ކަމަށް ކަށީގެ ހާއްސަ ޑޮކްޓަރަކާ ހަވާލާދީ ކަރެކްޝަންސް އިން ޝަރީއަތުގައި ބުނެފައިވާކަމަށް ބަޔާނުގައިވެ އެވެ. އަދި މި ލިޔުންތައް ޑޮކްޓަރު ދޫކުރި ފަހުން ކަކުލަށް ތަދުވާކަމުގެ ޝަކުވާ ވިސާމް ކުރުމުން ކަރެކްޝަނަލް ސާވިސްގެ މެޑިކަލް ޑޮކްޓަރަށް ދެއްކުމުން ކަށީގެ ހާއްސަ ޑޮކްޓަރަކަށް ދެއްކުމަށް ލަފާދީފައިވީ ނަމަވެސް ބަންދު މުރާޖައާ ކުރުމުގެ އަޑުއެހުން ބޭއްވި ދުވަހާއި ހަމަޔަށްވެސް ކަށީގެ ހާއްސަ ޑޮކްޓަރަކަށް ދައްކާފައިނުވާ ކަން ލިޔެކިޔުންތަކުން އެނގޭކަމަށެވެ.
މީގެ އިތުރުން އޭނާގެ ނަފްސާނީ ހާލަތާ ގުޅޭ ކަންތައްވެސް ޝަރީއަތުގެ އަޑުއެހުމުގައި ފާހަގަ ކޮށްފައިވާ ކަމަށާއި އެކަމާ ގުޅިގެން ކަރެކްޝަނަލް ސާވިސްގެ ޑޮކްޓަރަށް ދެއްކުމުން ނަފްސާނީ ބަލިތަކާ ބެހޭ ޑޮކްޓަރަކަށް ދެއްކުމަށް ލިޔުއްވާފައިވާ ކަމަށާއި ނަމަވެސް ނަފްސާނީ ބަލިތަކާ ބެހޭ ޑޮކްޓަރަކަށް ވިސާމް ދައްކާފައިނުވާ ކަމަށް ކްރިމިނަލް ކޯޓުގެ ބަޔާނުގައިވެ އެވެ. އެގޮތުން ކަރެކްޝަނަލް ސާވިސްގައި ހުންނަވާ ނަފްސާނީ ބަލިތަކުގެ ޑޮކްޓަރު ހުންނެވީ ޗުއްޓީގައި ކަމަށާއި އޭޑީކޭގައި އެވަގުތު ނަފްސާނީ ޑޮކްޓަރެއް ނެތްް ކަމަށާއި އައިޖީއެމްއެޗްގެ ނަފްސާނީ ހާއްސަ ޑޮކްޓަރަށް ދެއްކުމުގެ ކިޔު ވަރަށް ދިގު ކަމަށް ކަރެކްޝަންސް އިން ބުނެފައިވާ ކަމަށް ޚޯޓުގެ ސްޓޭޓުމެންޓުގައި ވެއެވެ. އަދި ވިސާމް ނަފްސާނީ ބަލިތަކުގެ ހާއްސަ ޑޮކްޓަރަކަށް ދެއްކޭނެ ދުވަހެއް ނޭނގޭ ކަމަށް ކަރެކްޝަންސް އިން ކޯޓުގައި ބުނެފައިވާ ކަންވެސް ފާހަގަ ކޮށްފައިވެއެވެ.
ވިސާމްގެ ފަރާތުން ޝަރީއަތުގައި ފާހަގަކޮށްފައިވާ އޭނާގެ ބަލި ހާލަތާއި ގުޅޭ ކަންކަމާ ގުޅިގެން ޕީޖީގެ ފަރާތުން ވިދާޅުވަނީ ކީކޭތޯ ޝަރީއަތުން ސުވާލުކުރުމުން ވިސާމްގެ ބަލި ހާލަތާއި ގުޅިގެން އެއްވެސް ކަމެއް ފާހަގަކުރަން ނެތްކަމަށް ބުނެފައި ވާކަމަށް ކްރިމިނަލް ކޯޓުން ނެރުނު ބަޔާނުގައި ފާހަގަކޮށްފައިވެ އެވެ. އަދި ވިސާމް ބަންދުން ދޫކޮށްލާފައިވަނީ ގިނަ ޝަރުތުތަކެއް ކޮށްފައި ކަމަށްވެސް ކޯޓުގެ ބަޔާނުގައިވެ އެވެ.
އިރުއަލިމަސް ނަމަކަށް ކިޔާ ދޯންޏެއްގައި، 61 ކިލޯ ހުންނަވަރުގެ މަސްތުވާތަކެތި ދިވެހިރާއްޖެއަށް އެތެރެކުރުމުގައި އެންމެ އިސްކޮށްހުރި މއ. ބޮއިލިންގފިޝް، އަހުމަދު ވިސާމްގެ އިތުރުން އެ މައްސަލައި ދެން ހިމެނެނީ، މުހައްމަދު ހަމީދު، ގދ. ރަތަފަންދޫ، ގުލްދަސްތާގެ، މުހައްމަދު މާއިޝް، މ. މާކޮޅު، މުހައްމަދު ޝާމިން، މއ. ވިރާހު، އަހުމަދު ޝިފާޒް، ހުޅުމާލޭ ފްލެޓް 06ޖީ4، އަބްދުﷲ ޝާމް، މއ. ބޯޅަކިންކިރިމާގެ، ހުސައިން ސުނާޒް، މ. މުލި، ސޯސަންވިލާ، ސައުދުﷲ ރަޝީދު، މ.ކެޕްރިކޯން، މުހައްމަދު ނަޝީދު، މ.މުލި، ހުދުފިނިފެންމާގެ، މުހައްމަދު މާއިދު، މ. ކޮޅުފުށި، އޯޝަންވިއު އަދި މުހައްމަދު ރިޟްވާން އިބްރާހިމް، މ. މުލި، މުސްތަރީގެ އެވެ.