އަންނަ ޑިސެމްބަރު މަހުގެ 20 ގައި ރިލީޒް ކުރަން ހަމަޖެހިފައިވާ ޔާޝްރާޖް ފިލްމްސް (ވައިއާރްއެފް) ގެ "ދޫމް 3" ގެ ދެވަނަ ޓީޒާ އާންމުކޮށްފި އެވެ.
އާމިރް ހާނާއި ކެޓްރީނާ ކެއިފް އަދި އަބިޝެކް ބައްޗަން އާއި އުދޭ ޗޯޕްޅާ ލީޑް ރޯލް ކުޅެފައިވާ "ދޫމް 3" ގެ ޓްރެއިލާ އަށް ގިނަ ބަޔަކު އަންނަނީ އިންތިޒާރު ކުރަމުންނެވެ. ދެވަނަ ޓީޒާ އާ އެކު ފިލްމްގެ ރަސްމީ ޕޯސްޓަރު ވެސް ވަނީ އާންމުކޮށްފަ އެވެ.
ބައެއް ފަރާތްތަކުން ގަބޫލް ކުރާ ގޮތުގައި އެމެރިކާގެ ޝިކާގޯގައި މަންޒަރުތައް ނަގާފައިވާ "ދޫމް 3" ބޮކްސް އޮފީހުގެ ގިނަ ރެކޯޑްތަކެއް މުގުރާލައި ބޮޑު ކާމިޔާބީއެއް ހޯދާނެ އެވެ.
މި ފިލްމްގައި އާމިރް ހާން ފެނިގެން ދާނީ ނުބައިބައި ރޯލަކުންނެވެ. އަދި އޭނާގެ ޑަބަލް ރޯލް ފެނިގެން ދާނެ ކަމަށް ވެސް ރިޕޯޓްތައް ބުނެ އެވެ.
ވައިއާރްއެފްގެ ކާމިޔާބް ފްރެންޗައިޒް "ދޫމް 3" ލިޔެ، ޑައިރެކްޓްކޮށްފައި ވަނީ ފުރަތަމަ ދެ ފިލްމްގެ ސްކްރީންޕްލޭ ލިއުނު ވިޖޭ ކްރިޝްނާ އަޗަރިއާ (ވިކްޓާ) އެވެ.
މި ފިލްމްގެ މިއުޒިކް ތައްޔާރުކޮށް ދީފައި ވަނީ "ދޫމް" އާއި "ދޫމް 2" ގެ މިއުޒިކް ޑައިރެކްޓަރު ޕްރިތަމް އެވެ.
އޭނާ ޑައިރެކްޓް ކުރި ފުރަތަމަ ފިލްމް 2008 ގެ "ތަޝަން" އަށް މާ ބޮޑު ކާމިޔާބީއެއް ލިބިފައެއް ނުވެ އެވެ.
އެ ފިލްމުގައި ލީޑް ރޯލް ކުޅެފައި ވަނީ ސައިފް އަލީ ހާނާއި ކަރީނާ ކަޕޫރުގެ އިތުރުން އަކްޝޭ ކުމާރާއި އަނިލް ކަޕޫރެވެ.