އެމްޑީޕީގެ ރިޔާސީ ކެންޑިޑޭޓް މުޙައްމަދު ނަޝީދު ލ. އަތޮޅަށް ކުރައްވާ ކެމްޕެއިން ދަތުރުފުޅެއް މިއަދު ފައްޓަވައިފި އެވެ.
މިއަދު ފެއްޓެވި މި ދަތުރުފުޅުގައި ހެނދުނު ކައްދޫ އެއަޕޯޓަށް ވަޑައިގަތުމާއެކު ނަޝީދަށް ވަނީ ހޫނު މަރުހަބާއެއް ކިޔައިފަ އެވެ.
މިއަށް ފަހު އެންމެ ފުރަތަމަ އެ މަނިކުފާނު ޒިޔާރަތް ކުރެއްވީ ފޮނަދޫ އެމްޑީޕީ ޖަގަހައަށާއި މުކުރިގަމު ޖަގަހައަށެވެ. އޭގެ ފަހުން މެދުއަވަށު ކަންމަތީ ބައްދަލުވުމުގައި ނަޝީދުވަނީ މުޙާތަބު ކުރައްވާފަ އެވެ.
މިއަދުގެ މެންދުރު ފަހު ގަން މުކުރިމަގު ޖަގަހަ، ގަން އާބާދު ޖަގަހަ، ގަން ތުނޑި ޖަގަހަ އަދި ގަން މަތިމަރަދޫ ޖަގަހައަށް ޒިޔާރަތްކުރައް ވާގޮތަށް ވަނީ ހަމަޖެހިފަ އެވެ. .
މި ޖަގަހަތަކަށް ވަޑައިގެން ކެމްޕެއިންގެ މަސައްކަތް ކުރިއަށްދާ ގޮތް އޮޅުންފިލުއްވައި އެމްޑީޕީއަށް ތާއިދު ކުރާ ފަރާތްތަކާ ބައްދަލު ކުރެއްވުމަށް ހަމަޖެހިފައިވެ އެވެ. އަދި ދެވަނަ ބުރުގައި އެމްޑީޕީ އަށް ތާއީދު ކުރަން ނިންމަވައިފައިވާ ފަރާތްތަކާ ވެސް ބައްދަލު ކުރައްވާނެ އެވެ.
މީގެ އިތުރުން އެ ޖަގަހަތަކުގައި ރައްޔިތުންނާ މުޙާތަބު ކުރައްވާ އެ މަނިކުފާނު ވާހަކަފުޅު ދައްކަވާނެ އެވެ.
މިރޭ ގަމު ތުނޑީ ސަރަހައްދުގައި އޮންނަ ރޭގަނޑު ފަރިއްކޮޅަށް ފަހު، ހާއްސަ ޖަލްސާއެއް އެ ރަށު ބައިބަލާ ކޯޓުގައި އޮންނާނެ އެވެ.
މި ޖަލްސާގައި އެމްޑީޕީގެ އިސް ވެރިންނާއި، ކެމްޕެއިން އޮފިޝަލުން އަދި ތާއީދު ކުރައްވާ ފަރާތްތަކަށް ވަނީ ދައުވަތު އަރުވާފަ އެވެ.
ނަޝީދު ލ. އަތޮޅަށް ކުރައްވާ ކެމްޕޭން ދަތުރުފުޅު ނިންމަވާލެއްވުމަށް ފަހު މާލެ ވަޑައިގަތުމަށް ހަމަޖެހިފައި ވަނީ މާދަމާ އެވެ.